O‘zbеkiston Rеspublikаsi Ichki ishlаr vаzirligi

Metropoliten tizimida jamoat xavfsizligini taʼminlash yoʻlida fidokorona xizmat olib borayotgan xodimlarga bayram tabrigi yoʻllandi. Ichki ishlar vaziri oʻrinbosari, general-mayor Baxodir Mirzaraximov Metropolitenda xavfsizlikni taʼminlash boshqarmasi xodimlarini Navroʻz ayyomi hamda Ramazon Hayiti bayramlari munosabati bilan samimiy tabrikladi.

Tadbir davomida soʻzga chiqqan vazir oʻrinbosari metropoliten tizimida xizmat qilayotgan xodimlarning masʼuliyatli va sharafli vazifani bajarib kelayotganini taʼkidladi. Ularning kundalik mehnati yoʻlovchilar xavfsizligini taʼminlash, jamoat tartibini saqlash hamda poytaxt transport infratuzilmasining barqaror ishlashida muhim ahamiyat kasb etishini qayd etdi.

General-mayor Baxodir Mirzaraximov oʻz nutqida xodimlarning fidoyiligi, hushyorligi va xizmatga sadoqati yuqori baholanishini bildirib, ularning kelgusidagi faoliyatida ham omad va zafarlar tiladi. Shuningdek, bayramlar munosabati bilan xodimlar va ularning oila aʼzolariga tinchlik, farovonlik hamda sihat-salomatlik tiladi.

Tadbir davomida xodimlarga bayram kunlarida xizmatni yanada hushyorlik bilan tashkil etish, jamoat tartibini ishonchli saqlash hamda fuqarolar xavfsizligini taʼminlash boʻyicha muhim vazifalar belgilab berildi. Shuningdek, jamoat tartibini taʼminlash hamda bayramlarni koʻngildagidek oʻtkazib olish maqsadida masʼul xodimlarga tegishli koʻrsatmalar berildi.

Shu bilan birga, vazir oʻrinbosari metropoliten hududida olib borilayotgan qurilish va obodonlashtirish ishlari bilan ham yaqindan tanishdi. Amalga oshirilayotgan bunyodkorlik ishlari, yangi infratuzilma loyihalari hamda yoʻlovchilar uchun yaratilayotgan qulayliklar yuzasidan mutasaddilarning axborotlari tinglandi.

Tadbir yakunida xizmat vazifalarini namunali bajarayotgan bir guruh xodimlarga minnatdorchilik bildirildi hamda ularning kelgusidagi faoliyatiga muvaffaqiyatlar tilandi.

IIV Transport va turizm obyektlarida xavfsizlikni taʼminlash departamenti Axborot guruhi