Kasb fidoyilari. Teran nikohlilar
2026-03-14 23:00:00 / Yangiliklar
Qarshi shahrida faoliyat koʻrsatuvchi masʼuliyati cheklangan jamiyat rahbari viloyat IIBning “112” xizmatiga murojaat qilib, korxona omborxonasidan 10 qop ammofos mineral oʻgʻiti oʻgʻirlab ketilganini bildirgan. Holat yuzasidan voqea joyiga tergov-tezkor guruhi chiqarilib, jinoyatni fosh etish tadbiri eʼlon qilinadi.
Jinoyat tezkorlikda fosh qilindi. Oʻgʻrilik sodir boʻlgan hududda xizmat olib borayotgan viloyat IIB JXX JTSB patrul-post xizmati batalyoni xodimlari -safdorlar Sh.Bozorov va Sh.Roʻziyev omborxona orqa devorining tashqi tomonida ammofos qoplarini olib ketayotgan uch kishini ushlashdi.
Dastlabki surishtiruvlarda mazkur jinoyatni masʼuliyati cheklangan jamiyat ishchilari — Ch.B., S.O. va Z.D. sodir etgani aniqlandi. Ulardan 10 qop ammofos mineral oʻgʻiti hujjatlashtirib olindi. Hozir holat yuzasidan jinoyat ishi qoʻzgʻatilib, tergov harakatlari olib borilyapti.
Safdorlar Shahzod Roʻziyev va Shahboz Bozorov oʻz kasbining ustasi. Ular koʻplab huquqbuzarlik va jinoyatlarni fosh etib, hamkasblariga oʻrnak boʻlmoqda, — deydi batalyon komandirining maʼnaviy-maʼrifiy ishlar boʻyicha oʻrinbosari, mayor Umid Mallayev. — Oʻz ustida ishlashni kanda qilmaydigan bu xodimlar yoshlarga kasb sirlarini oʻrgatishda ham faol.
Yana bir kun ortda qoldi. Bu — oddiy xizmat kuni emas, balki kasbiy mahorati, masʼuliyati va Vatan tinchligi yoʻlidagi fidoyiligini namoyon etgan xodimlar jasoratidir.
Osoyishta hayotimiz ortida ana shunday teran nikohli insonlar turibdi.
©️ “Postda” gazetasi, Sodiq Rahimov, Qashqadaryo viloyati.