IIV rahbariyati tomonidan Toshkent shahar IIBBning Voyaga yetmaganlarga ijtimoiy-huquqiy yordam koʻrsatish markazi faoliyati oʻrganildi
2026-03-14 09:00:00 / Yangiliklar
Oʻzbekiston Respublikasi Ichki ishlar vazirining birinchi oʻrinbosari, general-mayor Rustam Djurayev Toshkent shahar IIBB Voyaga yetmaganlarga ijtimoiy-huquqiy yordam koʻrsatish markaziga tashrif buyurdi.
Tashrif davomida u bolalar uchun yaratilgan sharoitlar hamda markazda voyaga yetmaganlarga ijtimoiy va huquqiy yordam koʻrsatish borasida amalga oshirilayotgan ishlar bilan tanishdi.
“Besh tashabbus” dasturi doirasida tashkil etilgan yangi kabinetlar, shuningdek, ustaxonalar (derazagarlik va tikuvchilik) hamda IT-sinf taqdim etildi.
Shuningdek, tarbiyalanuvchilar uchun zamonaviy sport zali ham tashkil etilgan boʻlib, u yangi sport jihozlari bilan taʼminlangan.
Tashrif davomida “Xavfsiz oila” loyihasiga alohida eʼtibor qaratildi. Ushbu loyiha oʻtgan yil Toshkent shahar tajribasi asosida amaliyotga joriy etilgan.
Markaz xodimlari qiyin ahvoldagi oilalar va ularning farzandlari bilan olib borilayotgan ishlar, shuningdek, ularga koʻrsatilayotgan qoʻllab-quvvatlash choralari haqida maʼlumot berishdi.
Oilaviy munosabatlarni mustahkamlash hamda voyaga yetmaganlarning huquq va manfaatlarini himoya qilishda profilaktik va ijtimoiy ishlarning ahamiyati alohida taʼkidlandi.
Markaz faoliyati bilan tanishgan rahbar mavjud muammolarni bartaraf etish va ish samaradorligini yanada oshirish boʻyicha amalga oshirilishi lozim boʻlgan vazifalarni belgilab berdi.
Shuningdek, voyaga yetmaganlarning ijtimoiy moslashuvini taʼminlash va ularning tezroq farovon hayotga qaytishiga koʻmaklashish maqsadida tegishli chora-tadbirlar belgilandi.
IIV JXD Axborot xizmati