Ichki ishlar vazirligida “Yurt obodligi, avvalo mahalladan boshlanadi!” shiori ostida xayriya hashari oʻtkazildi
2026-03-13 12:30:00 / Yangiliklar
Yurtimizda har yili mehr-oqibat va hamjihatlikni mustahkamlovchi Navroʻz umumxalq bayrami arafasida obodonlashtirish va koʻkalamzorlashtirish ishlari keng koʻlamda olib boriladi. Ana shu ezgu anʼanalar doirasida Ichki ishlar vazirligi Markaziy apparatida ham shaxsiy tarkib ishtirokida “Yurt obodligi, avvalo mahalladan boshlanadi!” shiori ostida umumxalq hashari tashkil etildi.
Mazkur hasharda vazirlik markaziy apparati rahbar va xodimlari faol qatnashib, hududni yanada obod va koʻrkam qilishga oʻz hissalarini qoʻshdilar. Hashar davomida xizmat binolari atrofini tartibga keltirish, hududlarni tozalash, daraxt va manzarali koʻchatlarga ishlov berish, yashil hududlarni kengaytirish hamda obodonlashtirishga qaratilgan qator ishlar amalga oshirildi.
Shuningdek, hashar jarayonida hududdagi yoʻlaklar va yashil maydonlar tartibga keltirilib, atrof-muhit tozaligi taʼminlandi. Bu kabi tadbirlar jamoada hamjihatlik va birdamlik muhitini yanada mustahkamlash bilan birga, milliy qadriyatlarimizga hurmat tuygʻusini kuchaytiradi. Navroʻz bayrami arafasida tashkil etilayotgan bunday xayrli tadbirlar nafaqat hududlarni obodonlashtirish, balki tabiatga mehr-muhabbat bilan munosabatda boʻlish, pokiza muhitni asrab-avaylash kabi ezgu fazilatlarni targʻib etishda muhim ahamiyat kasb etadi.
Ichki ishlar vazirligi tizimida ham Navroʻz bayrami munosabati bilan bunday obodonlashtirish ishlari izchil davom ettirilmoqda. Bu esa xizmat faoliyati bilan bir qatorda jamoatchilikka namuna boʻladigan muhitni shakllantirishga xizmat qiladi.