Respublika idoralararo muvofiqlashtiruvchi shtabi tomonidan Namanganda oʻrganishlar davom etmoqda
2026-03-13 11:40:00 / Yangiliklar
Bosh prokurorning birinchi oʻrinbosari Bahriddin Valiyev rahbarligida Prezidentning 05.01.2026-yildagi “Respublika mahallalarida xavfsiz muhitni yaratish yoʻnalishida yaxlit manzilli ishlash tizimini joriy etishga qaratilgan qoʻshimcha chora-tadbirlar toʻgʻrisida”gi PQ-1-sonli hamda “2026-yilda Respublika mahallalarida jinoyatchilikning barvaqt profilaktikasi samaradorligini yanada oshirish boʻyicha tashkiliy chora-tadbirlar toʻgʻrisida”gi PQ-2-sonli qarorlari ijrosini taʼminlash maqsadida Namangan viloyatida oʻrganishlar davom etmoqda.
Xususan, ishchi guruh tomonidan Davlatobod tumanidagi “Orzu” mahallasida kriminogen vaziyatni barqarorlashtirish, profilaktika ishlarini kuchaytirish hamda aholi bilan manzilli ishlash boʻyicha amalga oshirilayotgan chora-tadbirlar oʻrganilib, aniqlangan kamchiliklarni bartaraf etish boʻyicha masʼullarga tegishli koʻrsatmalar berildi.
Shuningdek, tuman prokuraturasi huzurida tashkil etilgan shtab faoliyati bilan tanishib, uning ishlash mexanizmi, belgilangan vazifalarning ijrosi hamda idoralararo hamkorlik masalalarini tahlil qilindi. Ushbu jarayonda tuman ishchi guruhi aʼzolari, “Mahalla yettiligi” va “Ijtimoiy profilaktika” yoʻnalishiga masʼul mutasaddilarga tasdiqlangan “Yoʻl xaritasi” doirasida belgilangan vazifalarni oʻz vaqtida va sifatli bajarish yuzasidan aniq topshiriqlar berildi.
Shu bilan birga, yoshlar, xotin-qizlar, muqaddam sudlangan shaxslar hamda ishsiz fuqarolar oʻrtasida jinoyatchilikning oldini olish maqsadida ularning bandligini taʼminlash, ijtimoiy muammolarini bartaraf etish, har bir shaxs bilan yakka tartibda profilaktik tadbirlar oʻtkazishni tizimli tashkil etish zarurligi taʼkidlandi. Xususan, mahallalarda oila-turmush munosabatlari doirasida sodir etiladigan huquqbuzarlik va jinoyatlarning barvaqt oldini olishda “Mahalla yettiligi”ning har bir aʼzosi zimmasiga yuklatilgan vazifalarni aniq belgilab olish, ularning masʼuliyatini yanada kuchaytirish yuzasidan masʼul idora va tashkilotlar vakillariga aniq vazifalar yuklatildi.
Respublika idoralararo muvofiqlashtirish shtabining Namangan viloyatidagi oʻrganishlari davom etmoqda.
Namangan viloyati IIB Axborot xizmati