Mahalla yettiligi bilan muloqot: Buxoro tumani “Rabotiqalmoq” mahallasini “yashil” hududga aylantirish choralari belgilandi
2026-03-13 11:30:00 / Yangiliklar
Viloyat IIB boshligʻining navbatdagi manzili Buxoro tumanidagi “Rabotiqalmoq” mahalla fuqarolar yigʻini boʻldi. Bu yerda boshqarma boshligʻi mahalla “yettiligi” ishtirokida muhokama yigʻilishi oʻtkazib, hududda jamoat xavfsizligini taʼminlash va ijtimoiy-maʼnaviy muhitni sogʻlomlashtirish masalalariga toʻxtaldi.
Yigʻilish avvalida mahalla raisining hududdagi joriy holat yuzasidan taqdimoti, shuningdek, profilaktika inspektorining kelgusida amalga oshirishi lozim boʻlgan ustuvor vazifalari yuzasidan axboroti tinglandi.
Shundan soʻng, boshqarma boshligʻi davlatimiz rahbari tomonidan ilgari surilgan tashabbuslar asosida har bir mahallani eng xavfsiz hududga aylantirish zarurligini taʼkidladi. Xususan, xavfsizlikni raqamlashtirish maqsadida, har bir koʻchaning kirish va chiqish qismlariga yuzni hamda avtotransport davlat raqam belgilarini aniqlovchi aqlli kameralar oʻrnatish boʻyicha koʻrsatmalar berildi. Amaliyotga “Chilonzor tajribasi”ni joriy etish, jumladan, davlat rahbarining 2026-yil 5-yanvardagi PQ-1 va PQ-2 qarorlari talablaridan kelib chiqib, tizimli ish tashkil qilish muhimligi qayd etildi.
Muloqot davomida jinoyatchilik va huquqbuzarliklarning oldini olishga qaratilgan qator amaliy vazifalar belgilab olindi. Jumladan, mahalladagi notinch oilalar va ulardagi nizolarni barvaqt aniqlab, bartaraf etish, probatsiya hisobida turuvchi shaxslar ustidan qatʼiy nazorat oʻrnatish, surunkali spirtli ichimlik isteʼmol qiluvchi fuqarolar bilan individual profilaktik ishlar olib borish, yoshlar bandligi va ularning muammolarini doimiy oʻrganish, mahallani toʻliq jinoyatdan xoli hududga aylantirish choralari koʻrildi.
Boshqarma boshligʻi ish unumdorligini oshirish maqsadida “mahalla yettiligi” faoliyatini muvofiqlashtirish tartibiga ham toʻxtalib oʻtdi. Endilikda har bir xodim kundalik ish rejasini puxta ishlab chiqishi, mavjud muammolarni birgalikda oʻrganib, kun yakunida bajarilgan ishlar yuzasidan mahalla raisiga hisobot berishi shartligi belgilandi. Oʻz navbatida, ish rejasida kamchilikka yoʻl qoʻygan masʼullar faoliyatini tanqidiy muhokama qilib borish samaradorlikni oshirishi taʼkidlandi.
Yakunda, hozirgi kunda “sariq” toifada boʻlgan “Rabotiqalmoq” mahallasini yil yakuniga qadar “yashil” toifaga oʻtkazish yuzasidan “yettilik” vakillariga aniq muddatli topshiriq va vazifalar yuklatildi.
Buxoro viloyati IIB Axborot xizmati