Tergov departamenti ishchi guruhi tomonidan Namangan viloyatida tergov sifatini oshirish boʻyicha topshiriqlar ijrosi oʻrganilib, amaliy yordam koʻrsatilmoqda
2026-03-13 11:05:00 / Yangiliklar
Ishchi guruh tomonidan Namangan viloyatining shahar-tumanlarida xizmat qilayotgan tergovchilar yurituvidagi jinoyat ishlari va tergovga qadar tekshiruv hujjatlari boʻyicha dastlabki tergovni yuritish ahvoli oʻrganilib, amaliy yordam koʻrsatilmoqda.
Mavjud muammolar, xato va kamchiliklar muhokama etilib, zaruriy tavsiya va topshiriqlar berilmoqda.
Bunda, Jinoyat-protsessual kodeksida koʻrsatilgan talablarga rioya etish, jinoyat ishi doirasida ishtirokchilarning barcha vajlarini tergov yoʻli bilan tekshirish, dalillarni qonuniy asosda toʻplash va xolisona baholash, protsessual tartibda rasmiylashtirish masalalariga alohida eʼtibor qaratildi.
Ishchi guruh aʼzolari har bir tergov xodimlari bilan suhbatlashib, shahar-tumanlardagi tergov-tezkor guruhi faoliyatini oʻrganmoqda, shu bilan birga, tergovchilar yurituvidagi fosh etilmasdan qolgan va toʻxtatilgan jinoyat ishlari muhokama qilinib, tergov hamkorligini kuchaytirish borasida tegishli koʻrsatma va tavsiyalar berildi.
Oʻrganishda, elektron tizimlardan samarali foydalanish, tergovga qadar tekshiruvni yuritish, jinoyatlarni tergov qilish va qisqa muddatlarda qonuniy qarorlar qabul qilinishini taʼminlash yuzasidan tegishli vazifalar belgilandi.
Tergov xodimlariga “Elektron jinoiy-huquqiy statistika” yagona axborot tizimi va “E-material” elektron tizimi bilan ishlash, uning imkoniyatlari haqida tushuntirishlar berilib, ushbu sohada yuzaga kelayotgan muammolar muhokama etildi.
Namangan viloyatida tergov sifatini oshirish va ishni samarali tashkil qilish borasidagi oʻrganishlar davom ettirilmoqda.
IIV huzuridagi Tergov departamenti