Ayol va jamiyat. Oilani qutqargan mehr
2026-03-13 03:35:00 / Yangiliklar
...Urganch shahridagi «Gulchilar» mahallasida joylashgan xonadonlardan birida ogʻir sukunat hukm surardi. Shohruh Qadamboyev va Gulnoza Qurbiyazova oʻrtasidagi kelishmovchiliklar endi shunchaki janjal emas, balki yosh oilani jar yoqasiga olib kelgan jiddiy muammoga aylangandi.
Bundan xabar topgan Urganch shahar IIB HPB xotin-qizlar masalalari boʻyicha inspektori, kapitan Zuhra Tillaboyeva va mahalla profilaktika inspektori, mayor Sardor Ortiqov xonadonga kirib kelishdi. Zuhra Tillaboyeva suhbatni rasmiy ohangda emas, balki onalarcha muloyimlik bilan boshladi:
- Oila bir kunda qurilmaydi, — dedi u sokin ovozda. — Uni sabr bilan asrash kerak. Farzandingizning kelajagi sizlarning bugungi qaroringizga bogʻliq.
Avvaliga har ikki tomon ham oʻz haqligini isbotlashga urindi. Ammo kapitan Zuhra Tillaboyeva har bir gapni diqqat bilan tinglab, muammoning ildiziga yetib borishga harakat qildi. Er-xotin bilan alohida-alohida suhbatlashib, har ikkisining dardini eshitdi.
Maʼlum boʻlishicha, kelishmovchiliklar asosan maishiy masalalar, oʻzaro tushunmovchilik va sabrsizlik tufayli kelib chiqqan.
Zuhra Tillaboyeva tashabbusi bilan masala Oilaviy qadriyatlarni mustahkamlash komissiyasida ham muhokama qilindi. Komissiya aʼzolari oilaning saqlab qolinishi, farzand manfaati ustuvor ekanini alohida taʼkidlashdi. Samimiy yondashuv va tushuntirish ishlari, nihoyat, oʻz natijasini berdi. Er-xotin oʻzaro kelishib, oilani saqlab qolishga qaror qildi. Yosh kelin yana oʻz uyiga qaytdi.
Bu birgina oilaning tarixi emas, balki mehr va masʼuliyat bilan qilingan xizmat samarasidir. Xotin-qizlar masalalari boʻyicha inspektor, kapitan Zuhra Tillaboyevaning har bir kuni ana shunday oilalar taqdiri bilan bogʻliq. Uning maqsadi mojaroni jazo bilan emas, tushuntirish va murosaga keltirish orqali hal etishdir. Chunki bir oilaning saqlanishi bolalarning baxtli kelajagini saqlash demakdir.
Nilufar JABBOROVA, oʻz muxbirimiz.
Xorazm viloyati.