Namanganda yoshlar bandligi va ular bilan ishlash samaradorligi muhokama qilindi
2026-03-12 11:35:00 / Yangiliklar
Namangan viloyati hokimligida oʻtkazilgan videoselektor tarzida oʻtkazilgan yigʻilishda viloyat hokimi Shavkatjon Abdurazzoqov raislik qilib, unda viloyatdagi huquq-tartibot idoralari rahbarlari, shahar va tumanlar hokimlari hamda yoshlarga biriktirilgan mutasaddi rahbarlar ishtirok etdi.
Yigʻilishda yoshlar bandligini taʼminlash, ularning tadbirkorlik faoliyatini qoʻllab-quvvatlash, shuningdek “otaliqqa olingan” yoshlar bilan olib borilayotgan ishlar tahlil qilindi.
Tanqidiy ruhda oʻtgan yigʻilishda kun tartibidagi masalalar yuzasidan masʼuliyatsizlikka yoʻl qoʻygan ayrim rahbarlarning faoliyati keskin tanqid qilinib, ulardan aniq masʼuliyat talab etildi.
Shuningdek, yoshlar tadbirkorligini qoʻllab-quvvatlash doirasida amalga oshirilayotgan ishlar atroflicha koʻrib chiqildi. Xususan, “Biznesga birinchi qadam” dasturi doirasida 790 nafar yoshga kredit ajratilgani va 1 mingdan ortiq yangi ish oʻrni yaratilgani qayd etildi. Bu boradagi amaliy ishlarni izchil davom ettirish zarurligi taʼkidlandi.
Yigʻilish yakunida yoshlar bandligini taʼminlash, ularning muammolarini hal etish hamda har bir mahallada yoshlar bilan ishlash tizimini yanada kuchaytirish boʻyicha mutasaddi rahbarlarga aniq vazifalar belgilab berildi.
Namangan viloyati IIB Axborot xizmati