O‘zbеkiston Rеspublikаsi Ichki ishlаr vаzirligi

Buxoro shahri markazini zamonaviy qiyofaga kiritish, yoʻl infratuzilmasini yaxshilash va eng muhimi, aholi xavfsizligini taʼminlash maqsadida keng koʻlamli ishlar davom etmoqda.

Viloyat IIB boshligʻi markaziy koʻchalardagi taʼmirlash, koʻkalamzorlashtirish va xavfsizlikni taʼminlash jarayonlarini shaxsan piyoda yurib oʻrganib chiqdi.

Jarayonda asosiy eʼtibor qurilish sifatiga hamda shaharsozlik qoidalariga qatʼiy rioya qilinishiga qaratildi.

Yoʻl yoqasidagi savdo shoxobchalari va maʼmuriy binolar atrofini ozoda saqlash, tashqi koʻrinishini meʼyoriy talablarga keltirish bilan bir qatorda, mulkiy xavfsizlikni taʼminlash masalasiga ham alohida toʻxtalib oʻtildi.

Xususan, tadbirkorlar va obyekt rahbarlariga hududni toʻliq kameralashtirish, videokuzatuv moslamalarini markazlashgan tizimga integratsiya qilish hamda binolarni belgilangan tartibda qoʻriqlashga topshirish boʻyicha aniq vazifalar belgilandi.

Shuningdek, tungi yoritish chiroqlarini haydovchilar va yoʻlovchilar harakatiga xalaqit bermaydigan, xavfsizlik talablariga toʻla javob beradigan holatda oʻrnatish boʻyicha koʻrsatmalar berildi.

Ushbu tadbirlarni har bir mahalla fuqarolar yigʻini kesimida tizimli tashkil etish, davlatimiz rahbarining PQ-1 hamda PQ-2 qarorlari, shuningdek, “Chilonzor tajribasi” asosida mahalla yettiligi hamda profilaktika inspektorlarining bu boradagi hamkorligini kuchaytirish zarurligi taʼkidlandi.

Hududlarga koʻproq manzarali daraxtlar ekish ishlari ham bevosita mahallalar faollari ishtirokida amalga oshirilishi belgilandi.

Amalga oshirilayotgan bu oʻzgarishlar va qatʼiy talablarning barchasi fuqarolar xavfsizligi va osoyishtaligi uchun xizmat qiladi.

Berilgan barcha topshiriqlar ijrosi boʻyicha aniq muddatlar qoʻyilib, qatʼiy nazoratga olindi.

Bu kabi saʼy-harakatlar qadimiy shahrimizning yanada koʻrkamlashishiga hamda yurtdoshlarimizning tinch va farovon hayot kechirishiga zamin yaratadi.

Buxoro viloyati IIB Axborot xizmati