Namangan viloyat hokimligida joriy yilning ikki oyi davomida viloyatdagi jinoyatchilik ahvoli muhokama qilindi
2026-03-11 10:00:00 / Yangiliklar
Namangan viloyati hokimi Shavkatjon Abdurazzoqov raisligida oʻtkazilgan videoselektor yigʻilishida viloyat, shahar va tuman studiyalaridan huquqni muhofaza qiluvchi organlar rahbarlari, tegishli tashkilot va idoralar masʼullari, shuningdek joriy yilning dastlabki ikki oyi davomida jinoyat sodir etilishiga yoʻl qoʻyilgan mahallalar raislari hamda profilaktika inspektorlari ishtirok etdi.
Yigʻilish davomida viloyat hududida yil boshidan buyon qayd etilgan jinoyatlar tahlil qilinib, jinoyatchilik darajasi oshib, “qizil” toifaga kirgan mahallalardagi holat alohida koʻrib chiqildi.
Mazkur hududlarda yoʻl qoʻyilgan kamchiliklar mahalla raislari va profilaktika inspektorlari ishtirokida tanqidiy-tahliliy ruhda muhokama qilinib, mavjud muammolarning kelib chiqish sabablari atroflicha tahlil etildi.
Shuningdek, viloyat Ichki ishlar boshqarmasi boshligʻi tomonidan mahallalarda jinoyatchilik va huquqbuzarliklarning barvaqt oldini olish, aholi oʻrtasida profilaktik tadbirlarni kuchaytirish hamda Oʻzbekiston Respublikasi Prezidentining PQ-1 va PQ-2-son qarorlari ijrosini taʼminlash borasida amalga oshirilayotgan chora-tadbirlar yuzasidan batafsil maʼlumot berildi.
Yigʻilish yakunida viloyat rahbari tomonidan mahallalarda jinoyatchilikni kamaytirish, ularni jinoyatdan holi hududga aylantirish, PQ-1 va PQ-2-son qarorlari ijrosini toʻliq taʼminlash, kriminogen vaziyati ogʻir hamda “qizil” toifadagi mahallalarga biriktirilgan rahbarlarning shaxsiy masʼuliyatini yanada kuchaytirish, profilaktik ishlarni tizimli yoʻlga qoʻyish va aniq natijadorlikka erishish yuzasidan mutasaddilarga tegishli topshiriqlar berildi.
Namangan viloyati IIB Axborot xizmati