Xalqaro hamkorlik natijasida qidiruvda boʻlgan Oʻzbekiston fuqarolari Bahrayn va AQSHdan ekstraditsiya qilindi
2026-03-11 09:00:00 / Yangiliklar
Interpolning Toshkent va Manamadagi Milliy markaziy byurolari oʻrtasidagi yaqin hamkorlik natijasida Oʻzbekiston huquqni muhofaza qilish organlari tashabbusi bilan firibgarlik sodir etgani uchun xalqaro qidiruvda boʻlgan fuqaro Bahrayn Qirolligidan Oʻzbekiston Respublikasiga ekstraditsiya qilindi.
Ekstraditsiya ikki davlatning vakolatli idoralari tomonidan olib borilgan muvofiqlashtirilgan ishlar hamda Interpolning xalqaro politsiya hamkorligi kanallaridan samarali foydalanish natijasida amalga oshirildi.
Shu bilan birga, Amerika Qoʻshma Shtatlari elchixonasi bilan hamkorlikda Interpolning Oʻzbekiston Respublikasidagi Milliy markaziy byurosini axborot bilan taʼminlash doirasida oʻtkazilgan qoʻshma tezkor-qidiruv tadbirlari natijasida respublika ichki ishlar organlari tomonidan oʻta yirik miqdordagi oʻgʻirlikni sodir etganligi uchun qidiruvda boʻlgan Oʻzbekiston fuqarosi Oʻzbekiston Respublikasiga deportatsiya qilindi.
Tomonlar oʻrtasida oʻtkazilgan muzokaralar, hamkorlikdagi tezkor harakatlar va axborot almashinuvi natijalariga koʻra, Amerika Qoʻshma Shtatlarining vakolatli organlari qidiruvdagi shaxsni Oʻzbekiston Respublikasiga chiqarib yuborish toʻgʻrisida qaror qabul qildi.
Har ikki holat huquqni muhofaza qilish organlarining xalqaro hamkorligi samaradorligini hamda transmilliy jinoyatchilikka qarshi kurashda Interpol kanallari orqali tezkor maʼlumotlar almashish muhimligini tasdiqlaydi. Olib kelingan qidiruvdagi shaxslar sud oldida javob beradi va oʻziga munosib jazoni oladi.
Oʻzbekiston Respublikasida Interpolning Milliy markaziy byurosi