O‘zbеkiston Rеspublikаsi Ichki ishlаr vаzirligi

Toshkent shahrida xavfsiz muhitni shakllantirish va jamoat xavfsizligini yanada mustahkamlash borasida belgilangan vazifalar ijrosini taʼminlash maqsadida Mirobod tumanida kengaytirilgan xizmat oldi yoʻriqnomasi tashkil etildi.

Unda Ichki ishlar vaziri oʻrinbosari, general-mayor Baxodir Mirzaraximov rahbarligida tuman hududidagi kuch tuzilmalari rahbarlari hamda tegishli xizmat xodimlari ishtirok etdi.

Yoʻriqnoma davomida jamoat tartibini taʼminlash, fuqarolar tinchligi va xavfsizligini muhofaza qilish borasida amalga oshirilayotgan ishlar tahlil qilinib, qoʻriqlash, patrul-post, yoʻl patrul va profilaktika xizmatlarining tun-u kun uch smenali tartibda samarali xizmat olib borishi yuzasidan ustuvor vazifalar belgilab berildi. Shuningdek, xizmatni tashkil etishda intizom, masʼuliyat va tezkorlikka alohida eʼtibor qaratish lozimligi taʼkidlandi.

Yigʻilishda aholidan tushayotgan har bir murojaatga tezkor va samarali munosabat bildirish, shuningdek obyektlardan kelib tushayotgan tashvish xabarlariga hamkorlikda chora koʻrish tartibi ham atroflicha muhokama qilindi. Xodimlarga xizmat vazifalarini vijdonan bajarish, jamoat xavfsizligini taʼminlashda fuqarolar bilan yaqin muloqotda boʻlish boʻyicha aniq koʻrsatmalar berildi.

Shuningdek, tadbir doirasida Oltinkoʻl mahalla fuqarolar yigʻini “yettiligi” aʼzolari bilan uchrashuv oʻtkazilib, hududda joylashgan bozordagi xavfsizlik qoidalari, mavjud shart-sharoitlar hamda tartib-intizom holati oʻrganildi. Oʻrganishlar natijasida mavjud kamchiliklarni bartaraf etish va xavfsizlik choralarini yanada kuchaytirishga qaratilgan manzilli chora-tadbirlar belgilab olindi.

Tadbir yakunida xodimlar belgilangan vazifalar asosida xizmat joylariga tarqatildi. Bunday chora-tadbirlar Toshkent shahrida jamoat xavfsizligini taʼminlash, fuqarolarning tinch va osoyishta hayotini muhofaza qilishga xizmat qilishi taʼkidlandi.

IIV Transport va turizm obyektlarida xavfsizlikni taʼminlash departamenti Axborot guruhi