Jazoni ijro etish tizimida. Jamiyatning ajralmas qismi
2026-03-10 13:05:00 / Yangiliklar
Yoshlar kelajagi haqida gʻamxoʻrlik qilish doimo davlatimiz rahbarining eʼtiborida. Chunki mamlakatning, jamiyatning ertangi kuni bugungi yosh avlodning bilimi, maʼnaviyati va huquqiy ongiga bogʻliq. Hozir barcha sohalarda yoshlar qoʻllab-quvvatlanyapti, ularga isteʼdodlarini yuzaga chiqarishda koʻmaklashilmoqda.
IIV huzuridagi JIED boshligʻi, polkovnik Azizxon Umarxonovning Birinchi mintaqaviy hudud 24-sonli tarbiya koloniyasi tarbiyalanuvchilari bilan boʻlib oʻtgan ochiq muloqotida shu haqda gap bordi.
Tadbirdan koʻzlangan asosiy maqsad Yangi Oʻzbekistonda amalga oshirilayotgan, insonparvarlik ruhi bilan sugʻorilgan islohotlarning mazmun-mohiyatini tarbiyalanuvchilarga yetkazish, ularning huquqiy ongi va madaniyatini yuksaltirishdan iborat edi.
Uchrashuvda Oliy Majlis Qonunchilik palatasi huzuridagi Yoshlar parlamenti, «Yosh huquqshunoslar» klubi hamda «Barqaror hayot» nodavlat notijorat tashkiloti vakillari ham ishtirok etdi. Unda soʻzga chiqqanlar jazoni ijro etish tizimida tub burilish yasalganini, endilikda jazolash emas, balki tarbiyalash va inson qadrini ulugʻlash bosh mezonga aylanganini alohida taʼkidlashdi.
Haqiqatan ham, voyaga yetmaganlar bilan ishlashda ularning ong-u shuurini ijobiy tomonga oʻzgartirish, hayotga boʻlgan qarashlarini toʻgʻri shakllantirish ustuvor ahamiyat kasb etadi.
Tadbirda yoshlar taʼlim olishlari, kasb-hunar egallashlari uchun yaratilayotgan imkoniyatlar haqida batafsil tushunchalar berildi. Shuningdek, ochiq va samimiy muloqot chogʻida tarbiyalanuvchilarni qiziqtirgan savollarga mutaxassislar atroflicha javob qaytarishdi.
Maʼlumot oʻrnida shuni qayd etish kerakki, bugungi kunda jazoni ijro etish koloniyalarida umumiy oʻrta taʼlim bilan bir qatorda, turli kasb-hunarlarga oʻqitish yoʻlga qoʻyilgan. Bu esa mahkumlar ozodlikka chiqqanidan soʻng jamiyatda oʻz oʻrnini topishlariga zamin yaratadi.
Yuqoridagi kabi ochiq muloqotlar yoshlarga oʻz fikrini erkin bildirish, muammolarini ochiq aytish imkonini beradi. Eng muhimi, ular oʻzlarini jamiyatning ajralmas qismi sifatida his eta boshlashadi. Bu qayta tarbiyalash jarayonida eng muhim omillardan biri sanaladi.
Shahrizod Shokirov, Axborot xizmati boshligʻi, kapitan. “Postda”