8-mart — Xalqaro xotin-qizlar kuni munosabati bilan Qoraqalpogʻiston Respublikasi Ichki ishlar vazirligida bayram tadbiri boʻlib oʻtdi
2026-03-08 11:00:00 / Yangiliklar
Bayram tadbirida dastlab Oʻzbekiston va Qoraqalpogʻiston Respublikalarining davlat madhiyalari yangradi. Shundan soʻng tadbirni Qoraqalpogʻiston Respublikasi Ichki ishlar vaziri, polkovnik Baxtiyar Torebekov ochib berdi.
U oʻz chiqishida sohada samarali xizmat qilayotgan xotin-qizlarning jamiyatdagi oʻrni, ularning fidokorona mehnati va xizmatlarini alohida tilga oldi.
Darhaqiqat, bugun barcha sohalar qatori ichki ishlar organlarida ham xizmat olib borayotgan ayol xodimlar oʻz kasbining yetuk mutaxassisi sifatida yurtimiz tinchligi va jamiyat osoyishtaligi yoʻlida beminnat xizmat qilmoqda.
Bayram tadbirida Oʻzbekiston Respublikasi Ichki ishlar vaziri general-leytenant Aziz Toshpoʻlatovning Ichki ishlar organlari xotin-qizlariga yoʻllagan bayram tabrigi oʻqib eshittirildi.
Shundan soʻng, bayram munosabati bilan bir guruh xotin-qizlar namunali xizmatlari, yuksak masʼuliyati va jamoat xavfsizligini taʼminlashdagi xizmatlari uchun muddatidan ilgari maxsus unvon, Qoraqalpogʻiston Respublikasi Joʻqorgʻi Kengesining koʻkrak nishonlari hamda Oʻzbekiston Respublikasi Ichki ishlar vazirligining koʻkrak nishonlari, diplom va esdalik sovgʻalari bilan taqdirlandi.
Qoraqalpogʻiston Respublikasi IIV Orol-yulduzlari ansambli hamda madaniyat va sanʼat sohasi xodimlari tomonidan konsert dasturi taqdim etilib, unda ayol-qizlarning sabr-toqat, sadoqat, goʻzallik timsoli ekanligi yana bir bor oʻz aksini topdi.
Qoraqalpogʻiston Respublikasi IIV Axborot xizmati