Izboskan tumanida xizmatda namuna koʻrsatayotgan xodimlar Andijon viloyati IIB boshligʻi tomonidan ragʻbatlantirildi
2026-03-07 13:10:00 / Yangiliklar
Andijon viloyati IIB boshligʻi, polkovnik Sanjar Djabarov Izboskan tumani ichki ishlar boʻlimida boʻlib, hududda jinoyatchilik va huquqbuzarliklarning barvaqt oldini olish, jamoat tartibini mustahkamlash hamda aholi xavfsizligini taʼminlash borasida amalga oshirilayotgan ishlar yuzasidan yigʻilish oʻtkazdi.
Uchrashuv davomida joriy yil boshidan buyon mahallalarda huquqbuzarliklarning oldini olishga qaratilgan chora-tadbirlar natijasida bir qator ijobiy koʻrsatkichlarga erishilganligi qayd etilib, bu boradagi saʼy-harakatlarni izchil davom ettirish zarurligi taʼkidlandi.
Tadbirda jamoat tartibini saqlash, fuqarolar xavfsizligi va osoyishtaligini taʼminlash, huquqbuzarliklarning oldini olish hamda sodir etilgan jinoyatlarni fosh etishda xizmat vazifalarini sidqidildan bajarib kelayotgan bir guruh xodimlar alohida eʼtirof etildi. Ularning xizmat faoliyatidagi tashabbuskorligi va masʼuliyati inobatga olinib, pul mukofotlari bilan ragʻbatlantirildi. Shuningdek, ularni tarbiyalab voyaga yetkazgan ota-onalariga minnatdorlik ramzi sifatida tashakkurnomalar tantanali ravishda topshirildi.
Yigʻilish yakunida yaqinlashib kelayotgan 8 mart — Xalqaro xotin-qizlar kuni munosabati bilan tadbirga tashrif buyurgan barcha ayollar bayram bilan samimiy tabriklanib, ularga esdalik sovgʻalari ulashildi.
Andijon viloyati IIB Axborot xizmati