Xorazm viloyatida Bosh prokurorning birinchi oʻrinbosari B.Valiyev hamda Ichki ishlar vazirining oʻrinbosari R. Ashropov rahbarligida Respublika idoralararo muvofiqlashtirish shtabining sayyor yigʻini oʻtkazildi
2026-03-06 16:50:00 / Yangiliklar
Yigʻilishda Oʻzbekiston Respublikasi Prezidentining 2026-yil 5-yanvardagi “Respublika mahallalarida xavfsiz muhitni yaratish yoʻnalishida yaxlit manzilli ishlash tizimini joriy etishga qaratilgan qoʻshimcha chora-tadbirlar toʻgʻrisida“gi PQ-1-sonli hamda “2026-yilda respublika mahallalarida jinoyatchilikning barvaqt profilaktikasi samaradorligini yanada oshirish boʻyicha tashkiliy chora-tadbirlar toʻgʻrisida“gi PQ-2-sonli qarorlari ijrosi boʻyicha Respublika ishchi guruhi oʻrganishlarida aniqlangan kamchiliklar muhokama qilindi.
Kengaytirilgan tarzda oʻtkazilgan yigʻilishda Respublika idoralararo muvofiqlashtirish shtabi va ishchi guruhi aʼzolari, qator vazirlik va idoralar, jumladan, Oʻzbekiston mahallalar uyushmasi, Oila va xotin-qizlar qoʻmitasi hamda ularning hududiy tuzilmalari rahbarlari, huquq-tartibot organlari, taʼlim va ilmiy muassasalar masʼullari ishtirok etdi.
Muhokamada mahallalarda xavfsiz muhitni shakllantirish, huquqbuzarlik va jinoyatchilikning barvaqt profilaktikasini kuchaytirish, “manzilli ishlash“ tizimini samarali joriy etishga doir amaliy chora-tadbirlar tahlil qilindi.
Amalga oshirilayotgan ishlar hamda mavjud muammolar koʻrsatib oʻtilib, muammolarni bartaraf etish boʻyicha aniq vazifalar belgilab olindi.
Tadbir yakunida qarorlar ijrosi yuzasidan masʼul idora va tashkilotlar axborotlari tinglandi hamda belgilangan vazifalarni soʻzsiz va samarali taʼminlashga qaratilgan tegishli qaror qabul qilindi.