Nurafshon shahrida bankomatga oʻgʻirlikka tushgan shaxs voqea joyida qoʻlga olindi
2026-03-03 11:00:00 / Yangiliklar
Tungi soat 03:10 da Nurafshon shahri hududida joylashgan bankomat qurilmasidan tashvish signali kelib tushdi.
Maʼlum boʻlishicha, shu kuni soat 03:10 da Toshkent viloyati IIBB Qoʻriqlash boshqarmasiga Nurafshon shahar “Oppoq” MFY, Toshkent yoʻli koʻchasida joylashgan bankomatdan tashvish xabari kelib tushgan.
Xabar navbatchilik qismi orqali tungi xizmatga biriktirilgan tezkor guruhga zudlik bilan yetkazilgan va xodimlar 4 daqiqa ichida voqea joyiga yetib borgan.
Aniqlanishicha, bankomat ichida boʻlgan nomaʼlum shaxs ushlanganda, uning yonida bolgʻa, otvertka va boshqa xoʻjalik anjomlari borligi maʼlum boʻlgan. U bankomat eshigini buzib ochib, ichidagi pul mablagʻlarini oʻgʻirlashga uringan.
Koʻrilgan tezkor choralar natijasida Oʻrtachirchiq tumanida yashovchi, 1994-yilda tugʻilgan fuqaro (Y.A.) voqea joyida issiq izidan qoʻlga olindi.
Holat yuzasidan hududiy IIB tomonidan tergovga qadar tekshiruv harakatlari olib borilmoqda.
Toshkent viloyati IIBB Axborot xizmati