Xorazm viloyatida “Yangi Oʻzbekistonning shijoatli ayollari!” shiori ostida ichki ishlar organlari xotin-qizlarining V Respublika forumi boʻlib oʻtmoqda
2026-03-02 11:00:00 / Yangiliklar
Ichki ishlar organlarida xizmat qilayotgan xotin-qizlarni qoʻllab-quvvatlash, ularning ijtimoiy, iqtisodiy va kasbiy faolligini yanada oshirish, shuningdek ijodiy va intellektual salohiyatini namoyon etish maqsadida Oʻzbekiston Respublikasi Ichki ishlar vazirining tegishli farmoyishiga muvofiq joriy yilning 2–4-mart kunlari Xorazm viloyatida “Yangi Oʻzbekistonning shijoatli ayollari!” shiori ostida ichki ishlar organlari xotin-qizlarining V Respublika forumi boʻlib oʻtmoqda.
Mazkur forum ichki ishlar tizimida samarali xizmat qilayotgan xotin-qizlarning kasbiy mahoratini oshirish, tajriba almashish, ularni har tomonlama qoʻllab-quvvatlash hamda jamiyatdagi faolligini kuchaytirishga qaratilgan keng koʻlamli tadbirlarni oʻz ichiga oladi.
Forum doirasida qadimiy va betakror Xiva shahridagi Ichan-Qalʼa tarixiy majmuasida “Zakovat” intellektual oʻyini tashkil etildi. Tarixiy muhitda oʻtkazilgan mazkur bilimlar bellashuvida respublikaning turli hududlaridan tashrif buyurgan 18 ta jamoa ishtirok etdi.
Intellektual oʻyin davomida ishtirokchilar oʻzlarining bilim va tafakkuri, tezkor fikrlash qobiliyati hamda jamoaviy hamkorlik koʻnikmalarini namoyon etdilar. Bellashuv koʻtarinki ruhda, sogʻlom raqobat va doʻstona muhitda oʻtdi.
Taʼkidlash joizki, bunday tadbirlar ichki ishlar organlarida xizmat qilayotgan xotin-qizlarning nafaqat kasbiy, balki maʼnaviy-intellektual salohiyatini yuksaltirish, ularning jamiyat hayotidagi faol ishtirokini taʼminlashda muhim ahamiyat kasb etadi.
Forum tadbirlari davom etmoqda.
Xorazm viloyati IIB Axborot xizmati