Jazoni ijro etish tizimida. Har jihatdan peshqadam
2026-03-02 23:00:00 / Yangiliklar
Bahor nafasi kelayotgan, yangilanish, yasharish fasli yaqinlashib qolgan bir pallada IIV huzuridagi JIEDda Xalqaro xotin-qizlar kuniga bagʻishlab “Fidoyi ayol xodima”, “Eng yaxshi kitobxon xodima” koʻrik-tanlovlari hamda “Zakovat” intellektual oʻyini tashkil etildi.
“Fidoyi ayol xodima” koʻrik-tanlovi va sport musobaqalarida ishtirokchilarning jismoniy tayyorgarligi, oʻqotar qurollarni toʻliqsiz qismlarga ajratish va yigʻish hamda nishonni moʻljalga olish kabi jarayonlarda chaqqonligi, test sinovlarida esa nazariy bilimlari sinovdan oʻtkazildi.
“Eng yaxshi kitobxon xodima” tanlovida esa qatnashchilar kitobga boʻlgan mehrlari, oʻqigan asarlari va ulardan olgan saboqlari haqida teran mulohazalar bildirib, yuksak intellektual salohiyatga ega ekanliklarini koʻrsatishdi.
“Zakovat” intellektual oʻyinida tizim muassasalari va mintaqalaridan shakllangan jamoalar bilim va fikrlash borasida oʻzaro bahslashib, haqiqiy intellektual muhit yaratishdi.
Hakamlar hayʼatining qaroriga koʻra, “Fidoyi ayol xodima” koʻrik-tanlovida Birinchi mintaqaviy hudud 7-son JIEK Ishlab chiqarish sexi mutaxassisi, katta serjant Zarina Saydaliyeva gʻoliblikni qoʻlga kiritdi.
“Eng yaxshi kitobxon xodima” tanlovida 23-son Mahkumlar uchun ixtisoslashtirilgan kasalxona Davolash-profilaktik yordam koʻrsatish boʻlimi shifokori, mayor Nargiza Muhammadiyeva eng yuqori natijani qayd etib, oʻta bilimdon va nihoyatda maʼrifatli ekanini koʻrsatdi.
“Zakovat” intellektual oʻyinida esa Birinchi mintaqaviy muvofiqlashtirish markazining “Jasorat” jamoasi gʻalaba qozonib, har jihatdan peshqadam ekanini namoyon etdi.
©️ “Postda” gazetasi, Sadriddin Xayrullayev, katta leytenant.