Yuksak mukofot sohiblari. Vatanning sodiq oʻgʻloni
2026-03-01 17:05:00 / Yangiliklar
Tun sokin. Jangovar postda turgan soqchi uchun esa har bir soniya — masʼuliyat. Uning nigohida hushyorlik, qadamida ishonch, qalbida esa Vatanga sadoqat mujassam. IIV Qorovul qoʻshinlari harbiy xizmatchisi faoliyati ana shunday sukunat bagʻrida, ammo ulkan masʼuliyat ostida kechadi.
Namangan viloyati Pop tumanida joylashgan 7552-harbiy qismning 1-oʻqchi vzvod, 1-oʻqchi guruhi qorovul boshligʻi, katta serjant Jamshid Aliyev ana shunday fidoyi, mard Vatan himoyachilaridan. Uning IIV Qorovul qoʻshinlari safida xizmat qilayotganiga salkam 25 yil boʻldi.
Faoliyatining ilk davrida podpolkovnik Yoʻlchiboy Haydarov, katta serjant Muhammadjon Qoʻchqorov va Yashnarjon Turholovdan harbiy mahoratni, sohaning sir-asrorlarini oʻrgandi. Ustozlaridan olgan saboqlar kelgusidagi muvaffaqiyatlari uchun mustahkam poydevor boʻldi.
Yillar davomida u masʼuliyat va matonat maktabidan oʻtdi. Har bir nazariy mashgʻulot, har bir amaliy mashq, har bir sinov uni toblab, tajribasini boyitdi. Bugun lavhamiz qahramoni faqat tajribali harbiygina emas, balki koʻplab yoshlar uchun ustozdir. U oʻnlab shogirdlar tayyorladi. Jumladan, kichik serjantlar Maxsutali Qodirov, Islom Hamrayev, Gʻiyos Burxonovga xizmat sir-asrorlarini oʻrgatib, ularning jangovar, jismoniy va maʼnaviy-ruhiy sifatlarini shakllantirishga munosib hissa qoʻshdi.
— Ustozim katta serjant Jamshid Aliyevning ishchanligi, bosiqligi va har qanday holatda ham oqilona yoʻl tutib, toʻgʻri qaror qabul qilishiga qoyil qolaman, — deydi kichik serjant Gʻiyos Burxonov. — U kishi bizga faqat mahorat sirlarinigina emas, balki harbiylarga xos sabr-toqatli, intizomli va masʼuliyatli, irodali boʻlishni ham oʻrgatdilar. Har bir mashgʻulotda talabchan, biroq adolatli. Qiyin vaziyatlarda ham vazminlikni saqlash va shoshmashosharlikka yoʻl qoʻymaslik kerakligini taʼkidlaydilar.
Namunali harbiy intizomi va xizmatdagi yutuqlari uchun Jamshid Aliyev qoʻshin qoʻmondoni va harbiy qism komandiri tomonidan bir necha bor faxriy yorliqlar bilan taqdirlangan. 2023-yilda «Oʻzbekiston Respublikasi Mustaqilligining 23 yilligi» esdalik nishoni, 2026-yilda Oʻzbekiston Respublikasi Prezidentining tegishli farmoniga muvofiq «Sodiq xizmatlari uchun» medali bilan mukofotlandi.
- Kamtarona xizmatimning yuksak baholanishi masʼuliyatimni yanada oshiradi, — deydi qahramonimiz. — Bu eʼtirof men uchun yuksak ishonch ramzi. Davlatimiz rahbari tomonidan bildirilgan ishonchni oqlash uchun bundan keyin ham bor kuch-gʻayratim, bilim va tajribamni Vatanimiz tinchligi va osoyishtaligini taʼminlash yoʻlida safarbar etaman.
Jamshid Aliyev namunali oila boshligʻi sifatida turmush oʻrtogʻi Nilufar bilan uch nafar farzandni tarbiyalab voyaga yetkazmoqda. Qizi Ziyoda Toshkent davlat yuridik universitetining 2-bosqich talabasi. Rivoyatxon oliy taʼlim muassasasiga kirish uchun tayyorgarlik koʻrmoqda. Oʻgʻli Jasurbek esa hozirdanoq otasi kabi Vatan xizmatiga kamarbasta boʻlishni orzu qiladi.
Adolat Fayziyeva, oʻz muxbirimiz. “Postda”
Namangan viloyati