O‘zbеkiston Rеspublikаsi Ichki ishlаr vаzirligi

Buxoro shahar IIOFMB 3-sonli IIB HPB profilaktika inspektori, leytenant Akbarjon Hotamov oʻzining xizmat hududini besh qoʻldek biladi. Har bir xonadonning quvonchu tashvishi unga yaxshi maʼlum. Chunki faollar va uyboshilar bilan hamjihatlik yaxshi yoʻlga qoʻyilgan.

- Akbarjon, mahallamizda profilaktika inspektorining jamoat tartibini saqlash boʻyicha yordamchisi vazifasida bir yil ishlagach, 2023-yili profilaktika inspektori etib tayinlandi. Shundan beri birga ishlab kelyapmiz, - deydi “Doʻstlik” mahalla fuqarolar yigʻini raisi Begzod Abdullayev. -Hududimizda 30 ta koʻp qavatli uy, 2 ta ijtimoiy yotoqxona va 48 ta tadbirkorlik obyekti joylashgan. Mahallamiz 70 foiz kameralashtirilgan va viloyat IIB Tezkor boshqaruv markaziga integratsiya qilingan. Shuningdek, hududimiz koʻchalarida 80 foiz yoritish tizimi yoʻlga qoʻyilgan. Bularning sharofati va profilaktika inspektorimizning tinib-tinchimasligi bois, oʻtgan yili mahallamiz “Sariq” toifadan “Yashil” toifaga oʻtib, jinoyatdan xoli hududga aylantirildi.

Leytenant Akbarjon Hotamov har kuni ertalabki yoʻriqnomadan soʻng kamida ikki soat mahalla faollari bilan xonadonma-xonadon yurib, xatlov oʻtkazadi. Xatlov oʻtkazishda yangi kelgan ijarachilarni, jinoyatga moyil shaxslarni oʻrganib, ular bilan profilaktik ishlarni olib boradi. Shu bilan birga, “Mening inspektorim” ilovasiga fuqarolarni qoʻl telefoniga ulatish choralarini koʻrmoqda.

Bundan tashqari, profilaktika inspektori oʻziga murojaat etgan hech bir insonni noumid qaytarmaslikka harakat qiladi. Chunki ustozi mayor Jahongir Haydarov shunday oʻrgatgan. Jabrdiydaga yaqin qarindoshingga munosabatda boʻlganday muomala qil, deb koʻp takrorlardi u. Yana oʻzingni tutishing, xulq-atvoring bilan boshqalarga namuna boʻl, shundagina odamlar senga yuragini ochadi, deya tayinlardi.

Yaqinda profilaktika inspektorining tashabbusi bilan xolislar ishtirokida sobiq ovchi V.V.ning xonadoni tekshirilganda, temir javoni va yotoqxonasidan 16 dona gilza, 18 ta oʻqdori, shuningdek, sof vazni 18 gramm porox moddasini noqonuniy saqlab kelayotganini aniqladi. Hozirda fuqaro V.V.ga nisbatan jinoyat ishi qoʻzgʻatilgan. Lavhamiz qahramoni esa Ichki ishlar vaziri oʻrinbosari tomonidan qimmatbaho sovgʻa bilan mukofotlandi.

Mirzoqul AHADOV, oʻz muxbirimiz.
Buxoro viloyati.