Gʻijduvonda 48,5 mln soʻmlik narkotik dorilar oʻzlashtirilgani fosh etildi
2026-02-28 19:25:00 / Yangiliklar
Buxoro viloyati. Gʻijduvon tuman tibbiyot birlashmasi kattalar anesteziologiya va reanimatsiya boʻlimi katta feldsheri lavozimida ishlab kelgan fuqaro Ya.R. 2023–2025-yillar davomida oʻz xizmat mavqeyidan foydalanib, reanimatsiya boʻlimi hamshiralari bilan jinoiy til biriktirgan holda, tarkibida giyohvandlik vositalari boʻlgan “Morfin gidroxlorid 1%”, “Promedol 2%”, “Fentanil 0.005%” va “Omnopon” dori vositalarini qonunga xilof ravishda egallagan.
U moddiy javobgar shaxs sifatida birlashma ichki dorixonasidan olingan narkotik dorilar hisobini yuritish jurnallari va talabnomalariga soxta maʼlumotlar kiritish orqali rasmiy hujjatlarni qalbakilashtirganligi aniqlangan.
Tergovda aniqlanishicha, jami 7 894 dona, umumiy qiymati 48 mln. 551 ming 667 soʻmlik narkotik dori vositalari mansab mavqeyini suiisteʼmol qilish yoʻli bilan talon-toroj qilinib, oʻzlashtirilgan. Shuningdek, koʻp miqdordagi morfin, trimeperidin, fentanil va boshqa giyohvandlik moddalari qonunga xilof ravishda egallangani maʼlum boʻlgan.
2025-yil 11-iyun kuni mazkur holat yuzasidan jinoyat ishi qoʻzgʻatilib, fuqaro Ya.R.ga nisbatan Oʻzbekiston Respublikasi Jinoyat kodeksining 167, 228 va 271-moddalari bilan ayblov eʼlon qilingan hamda “qamoqqa olish” ehtiyot chorasi qoʻllanilgan.
Ekspertiza xulosasiga koʻra, u giyohvandlik kasalligiga chalingan va majburiy davolanishga muhtoj ekani aniqlangan.
Jinoyat ishining ayrim qismi reanimatsiya boʻlimi hamshiralariga nisbatan alohida ish yurituvga ajratilgan. Tergov harakatlari yakunlanib, ish sud muhokamasiga yuborilgan.
IIV Tergov departamenti