Namangan viloyati IIB rahbariyatining oʻrganishlari Yangiqoʻrgʻon tumanida davom ettirildi
2026-02-28 19:20:00 / Yangiliklar
Mahallalarda jinoyatchilikning oldini olish va huquqbuzarliklar profilaktikasi yoʻnalishida profilaktika inspektorlarining xizmat faoliyati Namangan viloyati IIB rahbariyati tomonidan tizimli ravishda oʻrganilib, aniqlangan kamchiliklarni bartaraf etish maqsadida amaliy yordam koʻrsatilmoqda.
Jumladan, ishchi guruh tomonidan Yangiqoʻrgʻon tumanining “Barkamol”, “Baraka” va “Qizilqiyoq” mahallalari profilaktika inspektorlarining oʻtgan davr mobaynidagi xizmat faoliyati tanqidiy-tahliliy ruhda koʻrib chiqildi. Shu bilan birga, kelgusida jinoyatchilik va huquqbuzarliklarning barvaqt oldini olish, aholi muammolarini doimiy ravishda oʻrganib borish hamda bu borada manzilli ishlarni samarali tashkil etish yuzasidan aniq topshiriqlar berildi.
Shuningdek, tumanda joylashgan “Isʼhoq xoji” jome masjidi ham koʻzdan kechirilib, u yerda amalga oshirilgan xavfsizlik chora-tadbirlari, taroveh namozi vaqtida fuqarolar uchun yaratilgan shart-sharoit va qulayliklar bilan tanishildi.
Oʻrganishlar davomida tuman IIB rahbariyatining mahallalarni jinoyatdan holi hududga aylantirish boʻyicha taqdimoti tinglanib, Oʻzbekiston Respublikasi Prezidentining PQ–1 va PQ–2-son qarorlari ijrosi doirasida manzilli ishlarni tashkil etish, shuningdek, Toshkent shahrining Chilonzor tumani tajribasidan samarali foydalanish boʻyicha aniq vazifalar belgilab berildi.
Bu kabi oʻrganish ishlari viloyatning barcha hududlarida tizimli ravishda davom ettirilmoqda.
Namangan viloyati IIB Axborot xizmati