O‘zbеkiston Rеspublikаsi Ichki ishlаr vаzirligi

Davlatimiz rahbarining joriy yil 27-yanvar kungi videoselektor yigʻilishida berilgan topshiriqlar ijrosini taʼminlash maqsadida Qarshi shahri hududida “Chilonzor tajribasi” asosida tizimli oʻrganishlar olib borilmoqda. Shu maqsadda viloyat Ichki ishlar boshqarmasi boshligʻi Abduvohid Ismoilov tomonidan Qarshi shahrida jinoyatchilikni barvaqt oldini olish, “Xavfsiz mahalla” tamoyili doirasida amalga oshirilayotgan ishlar holati atroflicha oʻrganildi.

Shahar hududidagi bozorlar, kichik maishiy xizmat koʻrsatish shoxobchalari, savdo majmualari, aholi gavjum joylar hamda transport qatnovi yuqori boʻlgan hududlarda xavfsizlik choralari koʻzdan kechirildi. Hududlarni kameralashtirish darajasi, belgilangan manzillarda SOS va tezkor harakatlanuvchi tashvish tugmalarining oʻrnatilishi, qoʻriqlash pultlari faoliyati oʻrganildi.

Oʻrganish jarayonida qoʻriqlash xizmati tezkor harakatlanuvchi tashvish tugmasi xodimlari bilan suhbatlashilib, ularning voqea joyiga yetib borish tezkorligi, maxsus avtotransport vositalari va zamonaviy aloqa hamda himoya vositalari bilan jihozlanganligi, kunlik kelib tushayotgan murojaatlar soni, chaqiruvlarga javob berish sifati va tezkorlik koʻrsatkichlari tahlil qilindi. Shuningdek, profilaktik reydlar samaradorligi, xizmat hududlari boʻyicha nazorat mexanizmlari ham muhokama etildi.

Tungi xizmatga jalb etilgan xodimlar bilan ham alohida suhbat oʻtkazilib, ularning xizmat olib borish sharoiti, tungi patrullik yoʻnalishlari, hududlarda jamoat tartibini saqlash borasidagi masʼuliyati, shaxsiy xavfsizlik choralariga rioya etilishi hamda xizmat intizomi masalalari yuzasidan tegishli tavsiyalar berildi.

Bundan tashqari, savdo majmualarining qoʻriqlovga olinganlik darajasi, ichki va tashqi hududlarda oʻrnatilgan videokuzatuv kameralari qamrovi, kirish-chiqish nazorati, yongʻin va favqulodda holatlar uchun xavfsizlik tizimlarining holati oʻrganilib, masʼullarga aniq topshiriqlar berildi. Xususan, kameralarning “Xavfsiz shahar” yagona tizimiga integratsiyasi, qoʻriqlash shartnomalarini kengaytirish, noqonuniy savdo va tartibsizlik holatlarining oldini olish boʻyicha profilaktik nazoratni kuchaytirish zarurligi taʼkidlandi.

Oʻrganish yakunida aniqlangan kamchiliklarni bartaraf etish, xizmat intizomini yanada mustahkamlash, zamonaviy texnologiyalardan samarali foydalanish hamda eng asosiysi, aholi ishonchini yanada oshirishga qaratilgan chora-tadbirlar belgilab olindi.