Oliy Majlisning Bola huquqlari boʻyicha vakili va Ichki ishlar vazirligi huzuridagi Jazoni ijro etish departamenti rahbariyati oʻrtasida amaliy uchrashuv boʻlib oʻtdi
2026-02-27 18:00:00 / Yangiliklar
Suhbat davomida Bolalar ombudsmani tomonidan bola oʻz ixtiyori bilan chiqib keta olmaydigan yopiq muassasalarda oʻtkazilgan monitoring tashriflari doirasida aniqlangan kamchiliklar haqida bildirilib, tergov hibsxonalari, tarbiya koloniyalarida saqlanayotgan voyaga yetmaganlar hamda ayollar koloniyalaridagi voyaga yetmagan qizlar uchun yaratilgan sharoitlar belgilangan minimal standartlarga yetarlicha muvofiq emasligi, sanitariya talablaridan ogʻishlar kuzatilgani bayon etilib, mazkur yopiq muassasalarda bolalar uchun barcha standartlarni hamda taʼlim uchun shart-sharoitlarni taʼminlash zarurati mavjud ekanligi taʼkidlandi.
Uchrashuv jarayonida Jazoni ijro etish departamenti rahbari bugungi kunda jazo muddatini oʻtayotgan voyaga yetmaganlarni jamiyatga qayta integratsiya qilinishida koʻmak choralari koʻrilayotganligi haqida maʼlumot berib, sohada mavjud muammolarni oldini olishda Bolalar ombudsmani bilan tizimli hamkorlikni yoʻlga qoʻygan holda kamchiliklarni bartaraf etish zarurligini bildirdi.
Uchrashuv yakunida ikki tomonlama oʻzaro konstruktiv aloqalarini mustahkamlash hamda voyaga yetmaganlarga nisbatan jazo siyosatini transformatsiya qilish yoʻlida birgalikda ishlashga kelishib olindi.