Ichki ishlar vazirligi rahbariyati ishtirokida Fargʻona viloyatida tergov faoliyatini takomillashtirishga bagʻishlangan seminar oʻtkazildi
2026-02-27 17:00:00 / Yangiliklar
Ichki ishlar vaziri oʻrinbosari polkovnik Ramazon Ashropovning Fargʻona viloyatiga amalga oshirilgan xizmat tashrifi doirasida tergov faoliyatini takomillashtirishga bagʻishlangan oʻquv-amaliy seminar boʻlib oʻtdi.
Fargʻona viloyatida tergov faoliyatini yanada takomillashtirish va uni yangi bosqichga koʻtarish, ichki ishlar hamda prokuratura organlari tizimida faoliyat yuritayotgan tergov xodimlarining kasbiy bilim va koʻnikmalarini mustahkamlashga qaratilgan oʻquv-amaliy seminar tashkil etildi.
Ichki ishlar vazirligi, Bosh prokuratura va Oliy sud hamkorligida, Davlatimiz rahbarining oʻtgan yil 5-mart kuni Korrupsiyaga qarshi kurashish Milliy kengashi yigʻilishida hamda joriy yil 27-yanvar kuni Toshkent shahrida xavfsiz muhitni yaratish boʻyicha ilgʻor tajribani shakllantirish yuzasidan oʻtkazilgan videoselektor yigʻilishida belgilangan vazifalar ijrosini taʼminlash maqsadida Fargʻona viloyati IIBda mazkur seminar mashgʻuloti oʻtkazildi.
Tadbirda Ichki ishlar vaziri oʻrinbosari, polkovnik Ramazon Ashropov, Bosh prokurorning birinchi oʻrinbosari Bahriddin Valiyev, Oliy sud sudyasi Taganov Sardor Dilshodovich, viloyat IIB hamda uning quyi tuzilmalari tergovchi va surishtiruvchilari, viloyat prokuraturasi masʼul rahbarlari, tuman va shahar prokurorlarining sohaviy oʻrinbosarlari hamda tergovchilari, shuningdek, ommaviy axborot vositalari vakillari qatnashdi.
Seminar davomida “Jinoyatlar va hodisalar toʻgʻrisidagi ariza hamda xabarlarni qabul qilish, roʻyxatga olish, koʻrib chiqish va yakuniy qaror qabul qilish tartibi, shuningdek, ushbu jarayonlarda qonun ustuvorligini taʼminlash masalalari” mavzusida keng qamrovli maʼruzalar taqdim etildi.
Mazkur oʻquv-amaliy anjuman tergov sifatini oshirishda muhim ahamiyat kasb etib, unda tajribali mutaxassislar tomonidan sud jarayonlarida jinoyat ishlarini koʻrib chiqishda tergov va surishtiruv organlari tomonidan yoʻl qoʻyilayotgan kamchiliklar, tergov jarayonida raqamli kriminalistika asosida elektron dalillarni aniqlash va mustahkamlashning zamonaviy usullari, shuningdek, axborot texnologiyalaridan foydalangan holda sodir etilayotgan jinoyatlar — kiberjinoyatlarni fosh etishning oʻziga xos jihatlari yuzasidan maʼruzalar qilindi.
Shuningdek, bu kabi oʻquv-amaliy seminarlar kelgusida ham tizimli ravishda tashkil etilib, tergov faoliyati samaradorligini yanada oshirish hamda xodimlarning kasbiy mahoratini mustahkamlashga xizmat qiladi.
IIV Tergov departamenti