O‘zbеkiston Rеspublikаsi Ichki ishlаr vаzirligi

Surxondaryo viloyatida “poytaxt namunasi”, “Chilonzor tajribasi” asosida jamoat xavfsizligini taʼminlash, huquqbuzarlik va jinoyatchilikni barvaqt oldini olish boʻyicha amalga oshirilayotgan ishlar Ichki ishlar vazirligi ishchi guruhi tomonidan manzilli oʻrganildi.

Dastlab vazirlik ishchi guruhi masʼullari Termiz shahridagi Jazoni ijro etish departamentiga qarashli toʻrtinchi mintaqaviy hudud 9-son tergov hibsxonasi faoliyati va yaratilgan sharoitlar koʻzdan kechirildi.

Oʻrganishlar davomida hibsxonada saqlanayotgan maxsus kontingent hamda voyaga yetmaganlar bilan profilaktik suhbat olib borilib, ularga nisbatan qonunchilik talablariga rioya etilishi, oziq-ovqat mahsulotlarining sifat darajasi hamda sanitariya va gigiyena qoidalariga amal qilinishi yuzasidan suhbatlashildi.

Shuningdek, hibsxonada rejalashtirilgan qurilish va taʼmirlash ishlarini sifatli hamda belgilangan muddatlarda yakunlash boʻyicha topshiriqlar berildi.

Shundan soʻng, Termiz shahridagi murakkab toifaga kiruvchi Bogʻishamol mahallasida xavfsiz muhitni yaratishga qaratilgan saʼy-harakatlar natijadorligi tahlil qilindi.

Ushbu mahallaning alohida xususiyati shundaki kundalik kelib ketuvchi fuqarolar va sayyohlardan tashqari doimiy yashovchilar soni 17 858 nafarni tashkil etadi. Mahallada kriminogen vaziyatni barqarorligini taʼminlash maqsadida 1-sonli Ichki ishlar boʻlimi 102 huquq-tartibot maskani faoliyati bilan tanishildi.

Mahallani raqamlashtirish va kameralashtirish, jinoyatchilik holati, “ijtimoiy profilaktika” tizimi, ayollar va voyaga yetmaganlar jinoyatchiligi, ishsizlar, uzoq muddatga ketganlar bilan ishlash borasida olib borilayotgan ishlar bilan tanishildi.

­Oʻtgan yilning oʻzida mahalla hududiga 166 ta kuzatuv kameralari oʻrnatilib, profilaktika inspektori xonasida tashkil etilgan “Vaziyatlar markazi”ga integratsiya qilingan, bu bilan mahalla hududiga kirib-chiqayotgan avtotransport vositalarini identifikatsiya qilish, qidiruvdagi shaxslarni aniqlash, profilaktik va probatsiya hisobdagi shaxslarni nazorat qilish imkoniyati yaratildi.

Kameralashtirish natijasida oʻtgan yilda 2 nafar qidiruvdagi va 5 nafar bedarak yoʻqolgan shaxslar, 8 nafar probatsiya cheklovini buzish holatlari, 5 ta jinoyatlar va 21 ta yoʻqolgan buyumlar aniqlanishiga erishilgan.

Ichki ishlar vaziri tomonidan viloyat hamda shahar ichki ishlar boshqarmasi masʼullariga, mahalla hududida kriminogen vaziyatni yaxshilash, huquqbuzarlik va jinoyatchilikni barvaqt jilovlash hamda xodimlarning tun-u kun samarali xizmat olib borishi uchun yaratilgan shart-sharoitlar koʻzdan kechirilib, patrul-post, yoʻl-patrul, qoʻriqlash va profilaktika xizmatlari hamda Xavfsiz turizmni taʼminlash boʻlinmalari tomonidan uch smenali, uzluksiz xizmatni tashkil etish yuzasidan zarur koʻrsatmalar berildi.

Xususan, Termiz shahri “Farovon“ massivida kechayu-kunduz faoliyat olib borayotgan 24/7 saylgoh koʻchasida fuqarolar oqimi ortib borishini inobatga olgan holda jamoat tartibini saqlash uchun xizmatga jalb etilgan xodimlarga xizmat faoliyatini samarali tashkil etish va qulaylik yaratish maqsadida kichik 102 maskani qurish, avtoturargohlar sigʻimini kengaytirish, transport harakatini tartibga solish hamda favqulodda vaziyatlarning oldini olish tizimini takomillashtirish boʻyicha masʼullarga aniq topshiriqlar berildi.

Bu boradagi oʻrganish ishlari barcha xududlar boʻylab davom ettirilmoqda.

IIV Axborot xizmati