O‘zbеkiston Rеspublikаsi Ichki ishlаr vаzirligi

Botir (ismi oʻzgartirildi) poytaxtimizdagi 205-umumtaʼlim maktabining 10-sinf oʻquvchisi. U oxirgi paytlarda maktabga formasiz keladigan, sababsiz dars qoldiradigan odat chiqardi. Ustozlari ham uning taʼlim-tarbiyasi salbiy tomonga oʻzgarib borayotganidan shikoyat qilishdi. Mirzo Ulugʻbek tumani IIOFMB HPB Voyaga yetmaganlar va yoshlar profilaktikasini tashkil etish guruhi katta inspektor-psixologi, kapitan Mohinur Madirahimova «mahalla yettiligi» bilan oʻquvchining yashash manziliga borib, oilaviy sharoitini oʻrgandi.

Botirdagi oʻzgarishlar oilasi, yaqinlari taʼsirida emasdi. Bolaning feʼl-atvori uch-toʻrtta tanish oʻrtoqlari sabab oʻzgarayotgani oydinlashdi. Kapitan Mohinur Madirahimova Botirning yaqinlari bilan kelishgan holda uning vaqtini toʻgʻri taqsimlab, nazoratga oldi. Bolaning qiziqishlari, kelajakdagi maqsadlari, bu yoʻlda nimalar qilishi kerakligi haqida olib borilgan yakka tartibdagi profilaktik ishlar tezda oʻz samarasini berdi. Hozirda uning xulq-atvori ijobiy tomonga oʻzgardi, maktabga oʻz vaqtida keladi, dars jarayonlariga toʻliq qatnashib, sinfdoshlari bilan kelishib, aʼlo baholar olishga harakat qiladi.

Lavhamiz qahramoni xizmat jarayonida voyaga yetmaganlar bilan bogʻliq bu kabi holatlarga tez-tez duch keladi. Shunday kezlarda u muammoga olib boruvchi sabablarni sinchkovlik bilan oʻrganadi. Masalaga ijobiy yechim topishda eng muhim omillarni tahlil qilishdan erinmaydi. Chunki mutaxassis sifatida balogʻat davrida yoshlardagi koʻpchilikka tushunarsiz boʻlib koʻringan oʻzgarishlarni nazariy, amaliy jihatdan baholay oladi. Bunday vaziyatda qanday yoʻl tutish kerakligini yaxshi biladi.

- Oʻz oldiga katta maqsad qoʻygan inson faqat olgʻa intilishi, ortga chekinmasligi kerak, — deydi kapitan Mohinur Madirahimova. — Men hozirda Xorazm viloyati Urganch shahar IIOFMB 3-son IIB HPB katta inspektori sifatida xizmat olib borayotgan akam mayor Mansur Madirahimovga havas qilib shu sohani tanlaganman. 2018-yilda IIV Akademiyasini tamomlab, ilk xizmatimni Xorazm viloyati Qoʻshkoʻpir tumani IIOFMB 1-son ichki ishlar boʻlinmasida boshlaganman. Faoliyatim mobaynida taʼlim dargohida olgan bilimlarimni sohaviy xizmatlardagi amaliyot bilan uygʻunlashtirishga, zimmamdagi vazifalarni astoydil, toʻkis bajarishga harakat qilib kelyapman.

Ayni paytdagi qahramonimizning faoliyati yoshlar bilan bogʻliq boʻlib, unga poytaxtimizning Mirzo Ulugʻbek tumanidagi 205-, 221-, 223-umumtaʼlim maktabining oʻquvchi-yoshlari biriktirilgan. Ushbu maktablarda «Oila-mahalla-maktab» tamoyili asosida jinoyat sodir etish ehtimoli yuqori va salbiy yetakchilikka intilayotgan oʻquvchilar bilan maktab hamda «mahalla yettiligi» bilan hamkorlikda ishlab kelmoqda.

Bundan tashqari, dars vaqtida oʻquvchilarning nazoratsiz qolishining oldini olish maqsadida taʼlim maskanlari atrofida joylashgan internet klublari (kompyuterxonalar) va boshqa koʻngilochar joylarda «Oʻquvchi» tadbirini tashkil etyapti. Voyaga yetmaganlar oʻrtasidagi eng tashvishli muammo ichkilikbozlik, kashandalik, giyohvandlik, psixotrop va ularning aql-iroda faoliyatiga taʼsir etuvchi boshqa moddalar taʼsiriga tushib qolish, noqonuniy avtotransport vositalarini boshqarish. Bunday holatlarining oldini olish borasida ham muntazam profilaktik ishlar amalga oshirilmoqda. Umuman olganda, bugunning bolasi oʻta qiziquvchan. Bunda ularning vaqtini toʻgʻri taqsimlab, kerakli bilimlarni olishida qoʻllab-quvvatlash kerak. Shunda ular kelajagi uchun mustahkam poydevor qoʻyadi. Yoshi, bilim-tafakkuri zamon bilan baravar ulgʻayadi, yetuk shaxs sifatida shakllanadi.

Bugungi tezkor zamon vaqtning qadriga yetish, jamiyatda oʻz oʻrnini topaman degan kishidan intellektual salohiyatini tinimsiz oshirib borishni taqozo etadi. Bu aqidani oʻzi uchun ham muhim qoidaga aylantirgan kapitan Mohinur Madirahimova boʻsh vaqtlarida kitob mutolaa qiladi. Turk tilini oʻrganadi. Sport turlaridan voleybol, shaxmat bilan muntazam shugʻullanadi. Oila oshiyonida turmush oʻrtogʻi Jahongir Hojinazarov bilan yelkama-yelka turib, farzandlari Amiraxon, Muhammad Botirjon va Amaliyaxonlarning taʼlim-tarbiyasi haqida qaygʻuradi.

Aytgancha, kapitan Mohinur Madirahimova yaqinda Toshkent shahar IIBBda oʻtkazilgan «Fidoyi ayol xodima» koʻrik-tanlovida faxrli ikkinchi oʻrinni qoʻlga kiritdi. Ushbu quvonarli natija jonkuyar xodimaning chin maʼnoda kasbiy bilim va mahoratining, jismoniy imkoniyatlari, ijodkorligining oʻziga xos namoyishi boʻldi, desak aslo mubolagʻa emas.

Gulnoza Turgʻunboyeva, oʻz muxbirimiz. “Postda”
Toshkent shahri