Oʻzbekiston Respublikasi Ichki ishlar vazirligi va S.A. Gerasimov nomidagi Butunrossiya davlat kinematografiya universitetining Toshkent filiali oʻrtasida hamkorlik memorandumi imzolandi
2026-02-01 00:00:00 / Yangiliklar
Bugun, 26-fevral kuni Oʻzbekiston Respublikasi Ichki ishlar vazirligi hamda S.A. Gerasimov nomidagi Butunrossiya davlat kinematografiya universitetining Toshkent filiali oʻrtasida oʻzaro hamkorlik toʻgʻrisidagi Memorandum imzolandi.
Mazkur hamkorlikdan koʻzlangan asosiy maqsad — bugungi kunda keng tarqalayotgan ijtimoiy illatlar, xususan, giyohvandlik va psixotrop moddalarning noqonuniy savdosi, uyushgan jinoyatchilik, kiberjinoyatlar hamda yoshlar oʻrtasida ommalashib borayotgan huquqbuzarlik va jinoyatlarning boshqa turlarini talabalarning ijodiy ishlari orqali profilaktika qilish, ularning barvaqt oldini olishdan iboratdir.
Hamkorlik doirasida:
· ijtimoiy mavzulardagi qisqa metrajli filmlar, hujjatli loyihalar va roliklar yaratish;
· yosh ijodkorlar ishtirokida mahorat darslari va seminarlar tashkil etish;
· jinoyatchilikning zamonaviy koʻrinishlari boʻyicha ilmiy-amaliy hamkorlikni yoʻlga qoʻyish;
· huquqbuzarliklarning oldini olishga qaratilgan targʻibot materiallarini ishlab chiqish rejalashtirilgan.
Tadbirda yurtimizning taniqli ijodkorlari, fan va madaniyat arboblari, universitet professor-oʻqituvchilari hamda talabalar ishtirok etdilar. Soʻzga chiqqanlar mazkur hamkorlik yoshlarning huquqiy ongi va madaniyatini oshirish, ularni turli yot gʻoyalardan asrash hamda sogʻlom turmush tarzini targʻib qilishda muhim ahamiyat kasb etishini alohida taʼkidladilar.
Ushbu Memorandum ijod va huquqiy profilaktika yoʻnalishida yangi bosqichni boshlab berishi, sanʼat orqali jamiyatdagi dolzarb muammolarning asl mohiyatini fuqarolarimizga yetkazishga xizmat qilishi kutilmoqda.