O‘zbеkiston Rеspublikаsi Ichki ishlаr vаzirligi

Davlat rahbarining 2024-yil PF–73-son va 2025-yil PF–207-son farmonlari ijrosini taʼminlash maqsadida respublika hududida “Yoshlar orasida giyohvandlik vositalari va psixotrop moddalar tarqalishining oldini olish” kompleks tezkor-profilaktik tadbiri izchil amalga oshirilmoqda.

Xususan, Boʻstonliq tumanida joylashgan “Oqtosh” oromgohi hududida Ichki ishlar vazirligi Tezkor-qidiruv departamenti rahbariyati hamda Yoshlar ishlari agentligi “Antinarko yoshlar front-ofislari” koordinatorlari ishtirokida maxsus seminar-treninglar tashkil etildi. Unda hududlardan tashrif buyurgan 200 ga yaqin koordinatorlar giyohvandlikka qarshi kurashishning samarali usullari, yashirin xavflarni barvaqt aniqlash, tengdoshlarga toʻgʻri psixologik taʼsir oʻtkazish hamda SMM va zamonaviy media vositalari orqali taʼsirchan targʻibot mexanizmlarini qoʻllash boʻyicha zarur bilim va amaliy koʻnikmalarni egalladilar.

Mazkur tadbir doirasida yoshlar oʻrtasida giyohvandlik — shunchaki muammo emas, balki jamiyat va kelajak taraqqiyotiga jiddiy tahdid ekani keng jamoatchilikka yetkazilmoqda. Profilaktik va targʻibot ishlari tizimli ravishda tashkil etilib, yoshlarning huquqiy ongi va mafkuraviy immunitetini mustahkamlashga alohida eʼtibor qaratilmoqda.

Tadbir yakunida soha mutasaddilari tomonidan mazkur illatning oldini olishda katta-yu kichik — barcha birdek masʼul ekani alohida taʼkidlanib, yoshlar bilan ochiq muloqot tashkil etildi, taklif va tashabbuslar muhokama qilindi.

Endilikda trening ishtirokchilari egallagan bilim va tajribalariga tayangan holda oʻz hududlarida giyohvandlikka qarshi targʻibot ishlarini yangi bosqichda, yanada samarali va tizimli ravishda davom ettirishlari belgilab olindi.

Mazkur kompleks chora-tadbirlar yoshlar ongida sogʻlom turmush tarzini qaror toptirish, ularni turli zararli illatlar taʼsiridan asrash hamda jamiyat xavfsizligini mustahkamlashga xizmat qiladi.