Karantin xizmati. Sifatli mahsulot — salomatlik garovi
2026-02-24 23:00:00 / Yangiliklar
Qashqadaryo viloyati IIB JXX JTSB Karantin boʻlinmasi xodimlari vohadagi “Umakay”, “Mingchinor” va “Shirinbuloq” muntazam YPX maskanlarida tunu kun xizmat olib bormoqda.
Xususan, viloyat Veterinariya va chorvachilikni rivojlantirish hududiy boshqarmasi xodimlari bilan birgalikda bozorlarga sifatsiz, isteʼmolga yaroqsiz hayvon goʻshtlari kirib kelishining oldini olishga qaratilgan maxsus tadbirlar oʻtkazib kelinmoqda.
Hokimliklar, veterinariya xizmati va boshqa mutasaddi idoralar bilan hamkorlikda esa qassobxonalarda sifatli goʻsht va goʻsht mahsulotlari sotilishi nazorat qilinmoqda.
Raqamlarga murojaat qiladigan boʻlsak, dehqon bozorlarida 422-marta, mol bozorlarida 212-marta, boshqa savdo majmualarida 128-marta, aholi yashash joylarida 154-marta profilaktik reyd va targʻibot-tashviqot tadbirlari oʻtkazildi.
Natijada qassobxonalarda veterinariya-sanitariya qoidalariga rioya etmagan 32 nafar fuqaroga nisbatan maʼmuriy bayonnomalar rasmiylashtirildi.
Bundan tashqari, boʻlinma xodimlari Vazirlar Mahkamasining 1996-yil 18-yanvardagi “Oʻzbekiston Respublikasida odamlar va hayvonlarning quturish kasalligiga qarshi kurashni kuchaytirish chora-tadbirlari toʻgʻrisida”gi qarori, shuningdek, “Savdo shoxobchalari va bozorlarda goʻsht mahsulotlarini sotishga qoʻyiladigan talablar toʻgʻrisida”gi yoʻriqnoma talablari asosida faoliyat koʻrsatmoqda.
El salomatligi — yurt boyligi. Aholi salomatligini mustahkamlash esa, isteʼmol qilinayotgan mahsulotlar sifatiga bevosita bogʻliq. Karantin boʻlinmasi xodimlari zimmalaridagi masʼuliyatli vazifani sidqidildan ado etib, aholi salomatligini muhofaza qilish yoʻlida xizmat qilmoqda.
©️ “Postda” gazetasi, Sodiq Rahimov, Qashqadaryo viloyati.