Toshkent shahar Chilonzor tumanida “Xavfsiz shahar” konsepsiyasi doirasida kameralashtirish ishlari bosqichma-bosqich amalga oshirilmoqda
2026-02-21 09:00:00 / Yangiliklar
IIV “Xavfsiz shahar” tizimlarini rivojlantirish markazi mutaxassislari hamda Chilonzor tumani IIB xodimlari tomonidan tuman hududidagi mahallalar, savdo va xizmat koʻrsatish obyektlari, aholi gavjum joylar hamda ichki koʻchalarda intellektual videokuzatuv kameralarini oʻrnatish yuzasidan joylarga chiqib oʻrganishlar olib borilmoqda.
Jarayonda qurilmalarni maqbul joylashtirish nuqtalari aniqlanib, texnik imkoniyatlar, elektr taʼminoti va internet tarmogʻiga ulanish masalalari batafsil tahlil qilinmoqda.
Shuningdek, zamonaviy kameralar orqali real vaqt rejimida kuzatuvni yoʻlga qoʻyish, maʼlumotlarni yagona markazlashgan tizimga integratsiya qilish hamda tezkor xizmatlar bilan oʻzaro hamkorlikni kuchaytirish choralari koʻrilmoqda.
Mazkur tadbirlar jamoat xavfsizligini taʼminlash, huquqbuzarlik va jinoyatlarning barvaqt oldini olish, sodir etilgan holatlarni tezkor fosh etish hamda hududlarda barqaror va xavfsiz muhitni shakllantirishga qaratilgan.
Ichki ishlar vazirligining “Xavfsiz shahar” tizimlarini rivojlantirish markazi tomonidan bu boradagi ishlar izchil davom ettirilib, zamonaviy axborot-kommunikatsiya texnologiyalarini keng joriy etish orqali aholi osoyishtaligini taʼminlash ustuvor vazifa sifatida belgilangan.
Ichki ishlar vazirligining “Xavfsiz shahar” tizimlarini rivojlantirish markazi