Namangan viloyati IIB ishchi guruhining kompleks oʻrganish ishlari Uchqoʻrgʻon tumanida boʻlib oʻtdi
2026-02-20 12:20:00 / Yangiliklar
Boshqarma boshligʻi rahbarligidagi ishchi guruh tomonidan viloyatning barcha shahar va tumanlarida bosqichma-bosqich kompleks oʻrganish ishlari amalga oshirilmoqda. Mazkur oʻrganishlar doirasida Oʻzbekiston Respublikasi Prezidentining PQ-1 va PQ-2-son qarorlari ijrosi, jinoyatchilik hamda huquqbuzarliklarning barvaqt oldini olish borasida olib borilayotgan ishlar, shuningdek, oila-turmush doirasida sodir etilayotgan ogʻir va oʻta ogʻir turdagi jinoyatlarning kelib chiqish sabablari atroflicha tahlil qilinib, aniqlangan kamchiliklar yuzasidan amaliy yordam koʻrsatib kelinmoqda.
Jumladan, ishchi guruh navbatdagi kompleks oʻrganish ishlari doirasida Uchqoʻrgʻon tumanida boʻlib, unda “Norin”, “Oʻrdabogʻ” va “Fargʻona” mahallalarida xizmat olib borayotgan masʼul xodimlar faoliyati, shuningdek, “Saidxon Eshon” jome masjidida taroveh namozlari vaqtida jamoat xavfsizligini taʼminlash boʻyicha koʻrilgan chora-tadbirlar oʻrganildi.
Oʻrganishlar davomida “Norin” mahallasi hududida sodir etilgan qasddan badanga ogʻir tan jarohati yetkazish bilan bogʻliq jinoyatning kelib chiqish sabablari atroflicha muhokama qilinib, mahalla yettiligi faoliyatidagi mavjud kamchiliklar tanqidiy ruhda koʻrib chiqildi.
Shuningdek, mahallalarni jinoyatdan xoli hududga aylantirish, Toshkent shahrining Chilonzor tumani tajribasi asosida ishlarni samarali tashkil etish, mobil qurilmalardagi “Mening inspektorim” ilovasi orqali aholiga yaratilgan qulayliklarni keng targʻib qilish hamda profilaktik tadbirlar samaradorligini oshirish boʻyicha masʼul rahbarlarga aniq topshiriqlar berildi.
Namangan viloyati IIB Axborot xizmati