O‘zbеkiston Rеspublikаsi Ichki ishlаr vаzirligi

“Navbahor” mahallasi Chilonzor tumanining aholi gavjum qismida joylashgan. Hududdagi bozor, savdo doʻkonlari va boshqa maishiy xizmat koʻrsatish obyektlari bir tomondan aholiga qulaylik yaratayotgan boʻlsa, boshqa tomondan huquqbuzarliklar sodir etilish xavfini oshirmoqda.

IIV Akademiyasi boshligʻi mazkur mahallaning kriminogen vaziyatini oʻrganib, “poytaxt namunasi” asosida koʻp qavatli uylar, koʻchalar va jamoat joylarida osoyishtalikni taʼminlash, odamlar uchun xavfsiz muhit yaratish, huquqbuzarliklarning barvaqt oldini olish borasida qilinayotgan ishlar, amaliyotga joriy qilingan tajribalar bilan tanishdi.

Dastlab Prezidentimiz raisligida oʻtkazilgan videoselektor yigʻilishida belgilab berilgan dolzarb vazifalar ijrosi yuzasidan hudud masʼullari, akademiya ishchi guruhi vakillari hamda “mahalla yettiligi” tizimi xodimlarining axboroti tinglandi. Mahallaning kriminogen vaziyatiga salbiy taʼsir koʻrsatayotgan omillar muhokama qilindi.

Maʼlum boʻlishicha, “Chilonzor” metro bekati, gul bozori va ayrim doʻkonlar atrofi oʻgʻirlik jinoyatlari koʻp qayd etiladigan “jinoyat oʻchoq”lari sifatida baholangan. Mazkur hududlarda jamoat xavfsizligini taʼminlash maqsadida patrul-post xizmati va akademiya kursantlaridan iborat qoʻshimcha patrullik guruhlari tashkil qilinib, kriminogen nuqtalarga yoʻnaltirilgan.

Bundan tashqari, joylarga 78 ta videokuzatuv, 10 ta “Face-ID”, 2 ta “PTZ” kamerasi, 20 ta tungi chiroq, 28 ta “SOS” tashvish tugmasi oʻrnatilib, xavfsizlik choralari kuchaytirildi. Mahalladagi 900 dan ziyod xonadon oʻrganilib, 30 nafarga yaqin ijtimoiy profilaktika obyekti aniqlandi va “mahalla yettiligi” xodimlariga nomma-nom biriktirildi.

Sayyor qabullar davomida fuqarolar tomonidan bildirilgan murojaatlar asosida 60 ga yaqin muammoli masalalar ijobiy hal qilindi. Profilaktik tadbirlarni kuchaytirish maqsadida “targʻibotchi guruh”lar tashkil qilinib, huquqbuzarliklarning barvaqt oldini olishga qaratilgan uchrashuvlar oʻtkazib kelinmoqda.

Akademiya boshligʻi masʼullar bilan birgalikda choraklik “yoʻl xarita” bandlarini birma-bir muhokama qildi. Manzilli chora-tadbirlar “jinoyat oʻchoq”larida kriminogen vaziyatni barqarorlashtirish, poytaxt ahli va mehmonlari uchun xavfsiz muhit yaratishga xizmat qilishi kerakligini taʼkidlab, tizim samaradorligini oshirish yuzasidan vazifalarni belgilab berdi.

Shu kuni taʼlim muassasasi vakillari mahalla hududidagi “qaynoq nuqta”larga chiqib, fuqarolar bilan muloqot qildi. Metro bekati yaqinida 24 soat davomida faoliyat yuritayotgan mobil avtobus imkoniyatlari bilan tanishdi. Masʼullarga huquqbuzarliklar koʻp qayd etiladigan joylarga qoʻshimcha kuch-vositalarni yoʻnaltirish, kriminogen vaziyatni muntazam nazorat va tahlil qilib borish, xavf yuzaga kelganda zudlik bilan bartaraf etish borasida tavsiyalar berildi.

IIV Akademiyasi Axborot xizmati