Andijon viloyati Asaka tumanida sodir etilgan jinoyat yuzasidan sabab va shart-sharoitlar keng jamoatchilik bilan birgalikda tanqidiy muhokama qilindi
2026-02-20 11:30:00 / Yangiliklar
Asaka tumanining Qoʻngʻirot mahallasida sodir etilgan oila turmush doirasidagi ogʻir turdagi jinoyatning kelib chiqish sabablari, jamiyatdagi ijtimoiy-ruhiy muhitga taʼsiri hamda profilaktik chora-tadbirlarning samaradorligini oshirish masalalari boʻyicha Andijon viloyati prokurori Murodillo Abduhakimov hamda Ichki ishlar boshqarmasi boshligʻi Sanjar Djabarovlar raisligida muhokama yigʻilishi oʻtkazildi.
Keng jamoatchilik ishtirokida boʻlib oʻtgan muhokamada jinoyat sodir etilishiga sabab boʻlgan omillar, jamiyatdagi beeʼtiborlik, profilaktik tadbirlar samarasizligi va muayyan mutasaddi organlar faoliyatidagi kamchiliklar aniq faktlar asosida tanqidiy koʻrib chiqildi.
Muhokama davomida jinoyatning oldini olish imkoni boʻlgani, lekin masalaga “mahalla yettiligi” aʼzolari va boshqa masʼullar tomonidan taʼsirchan choralar koʻrilmaganligi keskin tanqid ostiga olindi.
Shuningdek, oʻtkazilgan muhokamada bugungi kunda keng tus olayotgan kiberjinoyatchilik va uning turlari xususida ham atroflicha soʻz yuritildi. Xususan, bank kartalari bilan bogʻliq oʻgʻrilik va firibgarlik jinoyatlarining oldini olish maqsadida “Telegram” messenjeri orqali tarqatilayotgan “.apk” virusli havolalarni aniqlash va oʻchirishga xizmat qiluvchi “@cybershielduz_bot” botinini har bir mahallada, “fuqarobay” tarzda oʻrnatish choralarini koʻrish zarurligi taʼkidlandi.
Shu bilan birgalikda, Oʻzbekiston Respublikasi Prezidentining 2025-yil 3-noyabrda qabul qilingan “Aholi salomatligi va millat genofondini giyohvandlik va narkojinoyatlardan samarali himoya qilish boʻyicha kompleks chora-tadbirlar toʻgʻrisida”gi PF–207-sonli Farmonida giyohvandlikning oldini olish borasida masʼul tashkilotlarga aniq vazifalar belgilab berilgani alohida taʼkidlanib, yoshlar orasida bu illatning oldini olish muhimligi haqida fikr mulohazalar bildirildi.
Tadbir yakunida barcha mutasaddilarga jinoyat sodir etilishini oldini olishga qaratilgan aniq topshiriq va vazifalar belgilab berildi.
Andijon viloyati IIB Axborot xizmati