O‘zbеkiston Rеspublikаsi Ichki ishlаr vаzirligi

Xorazm viloyati Ichki ishlar boshqarmasi majlislar zalida viloyatdagi huquq-tartibot va mutasaddi tashkilotlar rahbarlari ishtirokida «Ramazon – mehr-muruvvat, ahillik va shukronalik oyi» ezgu gʻoyasi asosida muborak oyni koʻtarinki ruhda va xavfsiz oʻtkazishga bagʻishlangan tezkor videoselektor yigʻilishi boʻlib oʻtdi. Tadbir viloyat miqyosida barcha kuch va vositalarni muvofiqlashtirish, profilaktik chora-tadbirlarni aniq rejalashtirish hamda jamoat xavfsizligini taʼminlash masalalariga bagʻishlandi.

Yigʻilishda huquqni muhofaza qiluvchi organlar rahbarlari, jumladan, viloyat hokimligi, viloyat Ichki ishlar boshqarmasi, DXX viloyat boshqarmasi, Milliy gvardiya boshqarmasi, Favqulodda vaziyatlar boshqarmasi hamda tegishli idora va tashkilotlar masʼullari ishtirok etdi. Hududiy studiyalar orqali shahar va tumanlar huquq-tartibot organlari rahbarlari hamda mutasaddilar videokonferensiya tarzida qatnashdi.

Kun tartibidagi asosiy masala — Oʻzbekiston Respublikasi Prezidentining 2026 yil 16 fevraldagi «Muborak Ramazon oyini munosib tarzda oʻtkazish toʻgʻrisida»gi PQ-65-sonli qarori hamda Oʻzbekiston Respublikasi Vazirlar Mahkamasining tegishli qarorlari ijrosini viloyat miqyosida sifatli va samarali taʼminlashdan iborat boʻldi. Qarorlarda belgilangan vazifalarning mazmun-mohiyati, xususan, jamoat xavfsizligini mustahkamlash, fuqarolarga qulay sharoit yaratish, yoʻl-transport harakati xavfsizligini taʼminlash, yongʻin va favqulodda holatlarning oldini olish kabi yoʻnalishlar atroflicha muhokama qilindi.

Yigʻilishda dastlab viloyat Ichki ishlar boshqarmasi boshligʻi, polkovnik Abdumajid Shermuxamedov Ramazon oyi davomida amalga oshiriladigan tashkiliy-profilaktik tadbirlar yuzasidan batafsil axborot berdi. Barcha masjidlar xavfsizlik nuqtai nazaridan koʻzdan kechirilgani, videokuzatuv tizimlari, yongʻinga qarshi vositalar va evakuatsiya yoʻlaklari holati oʻrganilgani qayd etildi. Shuningdek, jamoat joylarida patrul xizmatlari soni oshirilishi, tungi vaqtda nazorat kuchaytirilishi taʼkidlandi.

Taʼkidlanganidek, joriy yilda viloyatdagi 95 ta masjidda “Tarovеh” namozlari ado etilishi rejalashtirilgan. Shu munosabat bilan har bir masjid kesimida aniq kuch va vositalar taqsimoti amalga oshirilib, ichki ishlar organlari xodimlari, Milliy gvardiya va boshqa hamkor tashkilotlar bilan birgalikda jamoat tartibini kuchaytirilgan tartibda taʼminlash rejasi ishlab chiqildi.

Ayniqsa, katta avtomobil yoʻllari yoqasida joylashgan masjidlar atrofida transport vositalari harakatini vaqtincha cheklash, aylanma yoʻllarni belgilash, piyodalar xavfsizligini taʼminlash boʻyicha alohida chora-tadbirlar belgilab olindi. Yoʻl-patrul xizmati tomonidan tirbandliklarning oldini olish, fuqarolarga qulaylik yaratish va yoʻl harakati madaniyatini oshirishga qaratilgan profilaktik ishlar kuchaytiriladi.

Tadbir davomida boshqa huquqni muhofaza qiluvchi organlar rahbarlarining ham axborotlari tinglanib, oʻzaro hamkorlikni yanada kuchaytirish, axborot almashinuvini tezkorlashtirish va har qanday favqulodda holatlarga zudlik bilan munosabat bildirish mexanizmlarini takomillashtirish masalalari belgilab olindi.

Yigʻilish yakunida mutasaddilarga aniq topshiriq va vazifalar yuklatilib, har bir hududda Ramazon oyini osoyishta, xavf-xatarsiz va koʻtarinki ruhda oʻtkazish — barcha masʼul tashkilotlar oldidagi ustuvor vazifa ekani alohida qayd etildi. Mazkur chora-tadbirlar aholi uchun qulay va xavfsiz muhit yaratish, diniy marosimlarni tartibli tashkil etish hamda jamoat xavfsizligini mustahkamlashga xizmat qiladi.

Xorazm viloyati IIB Axborot xizmati