O‘zbеkiston Rеspublikаsi Ichki ishlаr vаzirligi

Sizda jismoniy imkoniyatlari cheklangan va pasportining amal qilish muddati tugaganligi sababli ID-kartaga almashtirilishi kerak boʻlgan yaqiningiz bormi? Unda siz quyidagilarni bilishingiz lozim. Siz keksa yoshdagi yoki kasalligi tufayli mustaqil harakatlana olmaydigan yaqiningizning biometrik maʼlumotlarini toʻplash uchun xonadoningizga yoki davolash muassasasiga boradigan xodim ajratilishi boʻyicha yashab turgan manzilingizdagi Migratsiya va fuqarolikni rasmiylashtirish boʻlimiga murojaat qilish imkoniga egasiz.

Buning uchun imkoniyati cheklangan shaxsning yaqinlari MvaFR boʻlimiga borib, pasport almashtirish haqida ariza berishi, avvalgi olingan pasportni taqdim etishi, shaxsning holatini tasdiqlovchi hujjat (tibbiyot muassasasi davolovchi vrachining xulosasi yoki mahalladan shaxsning sogʻligʻi tufayli harakati cheklanganini tasdiqlovchi maʼlumotnoma)ni taqdim etishi shuningdek, davlat bojini toʻlashi va oʻzining maʼlumotlarini qoldirishi kerak. Shundan soʻng xodim shaxsning biometrik maʼlumotlarini toʻplash uchun oʻzining maxsus koʻchma stansiyasi bilan bemorning yashash joyiga yoki davolanishda boʻlgan manziliga tashrif buyuradi.

Baʼzida imkoniyati cheklangan fuqarolarning qarindoshlari bemorlar uchun shaxsini tasdiqlovchi hujjatni yangilashning keragi yoʻq, deb hisoblashadi. Biroq, amaldagi hujjat toʻsatdan roʻy berishi mumkin boʻladigan turli vaziyatlarda, masalan, manzilni oʻzgartirishda, tibbiy muassasaga, davolash maskanlariga joylashtirishda yoki qaygʻuli holat – vafotini qayd etish holatlarida juda zarur boʻladi.

Imkoniyati cheklangan shaxslarning yaqinlaridan pasportni almashtirish masalasida loqayd boʻlmasliklarini, bu ishni zimmasiga olib, bemorning yashash manzilidagi Migratsiya va fuqarolikni rasmiylashtirish boʻlimlariga murojaat qilishlarini soʻrab qolamiz.

Eslatib oʻtamiz, mazkur jarayon darhol amalga oshirilmaydi, bu ish tuman boʻyicha murojaatlar tushishiga qarab (maʼlum vaqt ichida) bajariladi.

Yana bir eslatma, vaziyat tezkorlikni talab qilgan holatlarda, xodimning uyga tashrifining boshqa bir turi – ekspress–xizmat koʻrsatish (Oʻzbekiston Respublikasi Vazirlar Mahkamasining 2023-yil 31-iyuldagi «Migratsiya va fuqarolikni rasmiylashtirish, shuningdek, avtomototransport vositalarini davlat roʻyxatidan oʻtkazish va roʻyxatdan oʻtkazish davlat raqami belgilarini berish boʻyicha davlat xizmatlarini koʻrsatish tartibini takomillashtirish toʻgʻrisida»gi 321-son Qarori) yoʻlga qoʻyilgan. Bu xizmatdan istalgan fuqaro foydalanishi mumkin. Sayyor xizmatdan foydalanish uchun standart yigʻim va toʻlovlardan tashqari BHM 21,9 dan (agar masofa 10 km atrofida boʻlsa) 83,2 % gacha (100 km) tashkil etuvchi transport xarajatlari toʻlanishi lozim.

Ekspress-xizmatga buyurtma berishni 71-200-00-24 Call-markazi orqali amalga oshirish mumkin. Buyurtmani rasmiylashtirishda ID-kartaga muhtoj shaxsning «Ijtimoiy himoya yagona reyestri»da hisobda turishi aniqlansa, manzilga chiqish uchun toʻlov olinmaydi (faqat hujjatning oʻzi uchun BHMning 89 % miqdorida davlat boji toʻlanadi).