Qashqadaryo viloyati Chiroqchi tumanida joriy yil davomida sodir etilgan jinoyatlar muhokamasiga bagʻishlangan yigʻilish boʻlib oʻtdi
2026-02-18 09:00:00 / Yangiliklar
Unda Qashqadaryo viloyati Ichki ishlar boshqarmasi boshligʻi Abduvohid Ismoilov, tuman IIB rahbariyati, profilaktika inspektorlari, mahalla faollari hamda probatsiya hisobida turuvchi shaxslar ishtirok etishdi.
Muhokama davomida tumanda qayd etilgan jinoyat turlari, ularning asosiy sabablari, ijtimoiy-maishiy omillari hamda takror jinoyatchilik holatlari yuzasidan tahlillar qilindi.
Ayniqsa, yoshlar oʻrtasidagi huquqbuzarliklar, oilaviy nizolar, mehnatsizlik oqibatida sodir boʻlayotgan jinoyatlarga alohida eʼtibor qaratildi.
Yigʻilishda profilaktika inspektorlarining mahallalarda olib borayotgan ishlari tanqidiy koʻz bilan baholanib, har bir inspektorga oʻz hududidagi xavfli guruhdagi fuqarolar bilan yakka tartibda ishlash, probatsiya hisobida turuvchi shaxslarni jamiyatga qayta moslashtirish, ularning bandligini taʼminlash boʻyicha aniq vazifalar yuklatildi.
Probatsiya nazoratidagi shaxslar bilan ochiq muloqot oʻtkazilib, ularga qonun talablari, huquqiy majburiyatlari hamda jinoyat sodir etishning salbiy oqibatlari tushuntirildi.
Shu bilan birga, ularni ijtimoiy qoʻllab-quvvatlash, kasbga yoʻnaltirish va doimiy ish bilan taʼminlash masalalari ham muhokama markazida boʻldi.
Yakunda masʼul idoralarga jinoyatchilikka qarshi profilaktik tadbirlarni kuchaytirish, mahallalarda aholi ishtirokini oshirish va har bir holatga individual yondashuvni taʼminlash yuzasidan tegishli koʻrsatmalar berildi.
Bu esa tumanda jinoyatchilikni barvaqt oldini olish va xavfsiz muhitni shakllantirishga xizmat qilishi bilan ahamiyatlidir.
Qashqadaryo viloyati IIB Axborot xizmati