Namangan viloyati IIB ishchi guruhi tomonidan Kosonsoy tumanida kompleks oʻrganish ishlari olib borildi
2026-02-18 09:00:00 / Yangiliklar
Viloyatning barcha shahar va tumanlarida jinoyatchilikka qarshi kurashish, huquqbuzarliklarning barvaqt oldini olish, jamoat xavfsizligini taʼminlash hamda Toshkent shahrining Chilonzor tumani tajribasi asosida samarali tizimni joriy etish boʻyicha izchil va manzilli chora-tadbirlar amalga oshirilmoqda.
Mazkur jarayonlar boshqarma rahbariyati tomonidan muntazam oʻrganilib, aniqlangan kamchiliklarni bartaraf etish yuzasidan amaliy yordam koʻrsatib kelinmoqda.
Xususan, boshqarma boshligʻi rahbarligidagi ishchi guruh Kosonsoy tumanida boʻlib, tuman hokimi, prokurori va boshqa masʼullar ishtirokida “Iftixor” mahallasi yettiligi aʼzolari faoliyatini atroflicha tahlil qildi.
Oʻrganishlar davomida oila-turmush doirasida sodir etilgan oʻta ogʻir turdagi jinoyatlarning kelib chiqish sabablari va omillari chuqur tahlil etilib, ushbu turdagi jinoyatlarning barvaqt oldini olish, profilaktik ishlar samaradorligini oshirish hamda manzilli choralarni kuchaytirish boʻyicha aniq vazifalar belgilab berildi.
Shuningdek, chegaraoldi hududida joylashgan “Obod” mahallasida amalga oshirilayotgan profilaktik ishlar ham tanqidiy-tahliliy ruhda koʻrib chiqildi. Mahallani jinoyatdan holi hududga aylantirish, jamoat xavfsizligini mustahkamlash, aholi bilan manzilli ishlash tizimini takomillashtirish hamda xavfsizlik choralarini yanada kuchaytirish yuzasidan masʼullarga aniq topshiriq va koʻrsatmalar berildi.
Bundan tashqari, Kosonsoy tumani IIB xodimlarining hududda jinoyatchilikni barvaqt oldini olish boʻyicha kelgusida amalga oshirilishi rejalashtirilgan chora-tadbirlari yuzasidan taqdimoti bilan tanishildi.
Taqdimot davomida har bir yoʻnalish kesimida ustuvor vazifalar belgilab olinib, masʼul xodimlar zimmasiga aniq topshiriqlar yuklatildi hamda ijrosi qatʼiy nazoratga olindi.
Namangan viloyati IIB Axborot xizmati