Andijon viloyati IIB rahbariyati tomonidan Andijon shahrida tungi vaqtlarda xavfsiz muhit yaratish boʻyicha amalga oshirilayotgan ishlar oʻrganildi
2026-02-18 09:00:00 / Yangiliklar
Andijon viloyati IIB boshligʻi tomonidan Andijon shahrida “Chilonzor tajribasi” asosida jamoat xavfsizligini taʼminlash borasida amalga oshirilayotgan ishlar boʻyicha oʻrganishlar olib borildi.
Xususan, Andijon shahri boʻyicha IIO FMBda doimiy faoliyat yuritayotgan tezkor shtab faoliyati, mahallalar kesimidagi muammolar va ularni bartaraf etish yuzasidan biriktirilgan masʼullar tomonidan olib borilayotgan chora-tadbirlar muhokama qilindi. Mazkur yoʻnalishdagi ishlarni yanada kuchaytirish boʻyicha vazifalar belgilab berildi.
Shuningdek, Bunyodkor mahallasida joylashgan 42-sonli tayanch punktida xizmat olib borayotgan xodimlarning amalga oshirilayotgan ishlari oʻrganildi. Ular bilan mahallada xavfsiz muhitni yaratish, jinoyatchilik va huquqbuzarliklarni barvaqt oldini olish borasidagi ishlarni yanada kuchaytirish yuzasidan tushuntirish ishlari olib borildi.
Bundan tashqari, savdo, xizmat koʻrsatish va ijtimoiy soha obyektlarida Qoʻriqlash xizmati tomonidan oʻrnatilgan signalizatsiya va qoʻriqlov vositalarining texnik holati oʻrganilib, tadbirkorlarga qoʻriqlash tizimiga ulanishning ahamiyati tushuntirildi.
Shu bilan birga, jinoyat sodir etilishi ehtimoli yuqori boʻlgan hududlarda barvaqt profilaktik choralarini kuchaytirish maqsadida raqamlashtirish jarayonlarini jadallashtirish vazifalari belgilab berildi.
Andijon viloyati IIB Axborot xizmati