O‘zbеkiston Rеspublikаsi Ichki ishlаr vаzirligi

Fuqarolarning murojaatlari bilan ishlash tizimi samaradorligini oshirish, aholi bilan ochiq va samarali muloqotni yoʻlga qoʻyish maqsadida Ichki ishlar vazirligi huzuridagi Tergov departamenti tomonidan shaxsiy va sayyor qabullar muntazam ravishda tashkil etilmoqda.

Jumladan, Vazir oʻrinbosari R.Ashropov tomonidan navbatdagi shaxsiy qabul oʻtkazilib, aholining mavjud muammolarni aniqlash hamda ularni bartaraf etish maqsadida fuqarolarning murojaatlari tinglandi.

Qabul davomida jami 148 nafar fuqarolarning 129 dan ortiq murojaatlari oʻrganildi. Murojaatlarning 98 tasi tergov va surishtiruv faoliyati, 20 tasi tergovga qadar tekshiruv, 5 tasi xodimlarning xatti-harakatlari yuzasidan va 6 tasi ichki ishlar organlariga oid boshqa masalalarni tashkil etadi.

Shuningdek, aholiga qulaylik yaratish maqsadida Qoraqalpogʻiston Respublikasi va viloyatlar aholisi uchun shaxsiy qabul onlayn shaklda ham tashkil etilib, olis hududlarda istiqomat qiluvchi fuqarolarning mavjud muammolari videokonferens aloqa orqali tinglandi.

Shaxsiy qabul davomida Vazir oʻrinbosari hamda masʼul rahbar va xodimlar tomonidan fuqarolar bilan ularni qiynayotgan muammolar yuzasidan toʻgʻridan-toʻgʻri muloqot oʻtkazildi.

Xususan, tergovga qadar tekshiruv, surishtiruv va dastlabki tergov jarayonlari, migratsiya va fuqarolikni rasmiylashtirish, yoʻl harakati xavfsizligi hamda boshqa yoʻnalishlardagi murojaatlar qabul qilinib, ularni qonuniy va tezkor hal etish boʻyicha masʼullarga aniq koʻrsatmalar berildi.

Kelib tushgan murojaatlarning 31 tasi yoki 24 foizi shu joyning oʻzida qanoatlantirildi, 15 tasi yoki 11,6 foizi boʻyicha fuqarolarga tegishli tushuntirishlar berildi.

Qolgan 83 ta murojaat yoki 64,3 foizi qoʻshimcha oʻrganish talab etganligi sababli ijroga yoʻnaltirilib, oʻz vaqtida va xolisona koʻrib chiqilishi nazoratga olindi.

Aholi bilan bunday ochiq muloqot va shaxsiy qabullar tizimli ravishda davom ettirilmoqda.

IIV Tergov departamenti