Halollikni shior qilgan xodimlar. Qonunni sotib olib boʻlmaydi
2026-02-17 02:55:00 / Yangiliklar
Joriy yil 4-yanvar kuni taxminan soat 15:00larda Gʻuzor tumani IIB YHXB YPX inspektori, safdor Jasur Farmonov Ipak yoʻli koʻchasida xizmat olib borayotgan edi. Shu payt «Damas» rusumli avtomashinaning harakatlari unda shubha uygʻotdi.
Mashinani toʻxtatib, avtoulov haydovchisi bilan muloqotga kirishgan inspektor undan spirtli ichimlik hidi anqiyotganini sezdi. Holat yuzasidan haydovchi R.T.ga nisbatan tegishli hujjatlar rasmiylashtirildi, avtomashina esa jarima maydonchasidan joy oldi.
Oradan ikki kun oʻtdi. Haydovchi R.T.ning joniga bojasi Sh.S. oro kirmoqchi boʻldi, shekilli, maʼmuriy amaliyot inspektori, kichik serjant Sarvar Ulugʻmurodovning xizmat xonasida paydo boʻldi. Suhbat davomida Sh.S. bojasiga nisbatan tuzilgan bayonnomani oʻzgartirish va avtomashinani jarima maydonidan chiqarib berishi evaziga inspektorga 500 AQSH dollari miqdorida pora taklif etdi. Kichik serjant S.Ulugʻmurodov pora olish ham, pora berish ham jinoyat ekanini fuqaroga harchand tushuntirmasin, u ahdidan qaytmadi. Natijada xodim viloyat IIB rahbariyatiga bildirgi bilan murojaat qildi.
Joriy yil 6-yanvar kuni hamkorlikda tezkor tadbir oʻtkazildi. Tadbir davomida fuqaro Sh.S. kichik serjant S.Ulugʻmurodovga 500 AQSH dollari miqdoridagi pulni pora tariqasida bergan vaqtida qoʻlga olindi. Hozir holat yuzasidan Jinoyat kodeksining 211-moddasi 1-qismi bilan jinoyat ishi qoʻzgʻatilgan, dastlabki tergov harakatlari olib borilmoqda.
Bu dunyoda sotilmaydigan, sotib olib boʻlmaydigan narsalar ham bor. Pora bersam, yopigʻliq qozon yopigʻligicha qoladi, deb oʻylaganlar adashadi. Zotan, halol va oʻz kasbiga sodiq xodimlar bor ekan, har kim noqonuniy qilmishiga yarasha javob berishi, jazoga tortilishi tayin.
Sodiq RAHIMOV, oʻz muxbirimiz.
Qashqadaryo viloyati.