IIV Akademiyasida “Ilm va ayol: barqaror jamiyat sari” mavzusida tadbir oʻtkazildi
2026-02-15 09:00:00 / Yangiliklar
Xalqaro ilm-fan sohasidagi xotin-qizlar kuni munosabati bilan IIV Akademiyasida oʻtkazilgan tadbir shu mavzuga bagʻishlandi.
Tadbirda davlat va jamiyat hayotida xotin-qizlarning oʻrni, ular uchun yaratilayotgan keng imkoniyatlar, ilm-maʼrifatli, faol va tashabbuskor ayollar erishayotgan yutuqlar eʼtirof etildi.
Oliy Majlis Senati aʼzosi Malika Qodirxonova soʻz olib, mamlakatimiz taraqqiyotining hozirgi bosqichida xotin-qizlar masalasi davlat siyosatining ustuvor yoʻnalishlaridan biriga aylangani alohida taʼkidladi.
Buning samarasi oʻlaroq, bugunga kelib xotin-qizlarning davlat boshqaruvidagi ulushi 35 foiz, tadbirkorlik sohasida 45 foiz, siyosiy partiyalar safida esa 49 foizga yetgani qayd etildi.
Xususan, Oliy Majlis Qonunchilik palatasi deputatlarining 38 foizini, Senat aʼzolarining 27 foizini ayollar tashkil etmoqda. Keyingi yillarda vazir va vazirga tenglashtirilgan lavozimlarda faoliyat yuritayotgan ayollar ulushi salkam 3 barobarga oshgan.
Bundan tashqari, soʻnggi 7-yil ichida 5,2 ming nafar ayol fan doktori (DSc) va oʻz sohalari boʻyicha falsafa doktori (PhD) ilmiy darajasini olgan.
Muloqot ruhida oʻtgan tadbirda xotin-qizlarni qoʻllab-quvvatlash, ularning huquq va manfaatlarini himoya qilish, ilmiy-intellektual salohiyatini yuksaltirish, oila institutini mustahkamlash, gender tenglikni taʼminlash, xotin-qizlarni tazyiq va zoʻravonlikdan himoya qilishga qaratilgan izchil islohotlar eʼtirof qilindi.
Sud-huquq tizimi, qonun ijodkorligi, taʼlim va boshqa sohalarda samarali mehnat qilayotgan xotin-qizlar soʻz olib, oʻz fikr-mulohazalari, mamlakatimizni yanada taraqqiy ettirish yoʻlida olib borayotgan faoliyatlari, istiqboldagi rejalari bilan oʻrtoqlashdilar.
IIV Akademiyasi Axborot xizmati