Ichki ishlar vazirligi rahbariyati tomonidan jinoyatga oid arizalar, xabarlar va boshqa maʼlumotlarni koʻrib chiqish, qabul qilingan qarorlarning qonuniyligi hamda ijro intizomi holati tanqidiy muhokama etildi
2026-02-14 14:20:00 / Yangiliklar
2026-yil 27-yanvar kuni Prezidentimiz rahbarligida oʻtkazilgan yigʻilishda berilgan topshiriqlar hamda mahallalarda xavfsiz muhitni yaratish borasida amalga oshirilayotgan ishlar va yoʻl qoʻyilgan kamchiliklar yuzasidan tanqidiy yigʻilish boʻlib oʻtdi.
Yigʻilishda Ichki ishlar vazirining birinchi oʻrinbosari, general-mayor B.Qudratxodjayev, Ichki ishlar vaziri oʻrinbosari, polkovnik R.Ashropov, vazirlikning sohaviy xizmat rahbarlari, Toshkent shahri, Toshkent viloyati IIBB va barcha viloyatlar ichki ishlar boshqarmalari rahbariyati, shuningdek, viloyat sohaviy xizmatlar, shahar-tuman ichki ishlar boʻlimlari rahbarlari hamda tergovga qadar tekshiruv harakatlarini olib borishga masʼul boʻlgan xizmat xodimlari (huquqbuzarliklar profilaktikasi, tezkor qidiruv, yoʻl harakati xavfsizligi xizmatlari va tergov boʻlinmalari) ishtirok etdi.
Tadbir davomida jinoyatga oid arizalar, xabarlar va boshqa maʼlumotlarni koʻrib chiqish, qabul qilingan qarorlarning qonuniyligi hamda ijro intizomi holati chuqur tahlil qilindi.
Jumladan, jinoyatga oid ariza va xabarlarni qabul qilish hamda ularni tekshirish boʻyicha amalga oshirilgan ishlar va yoʻl qoʻyilayotgan kamchiliklar tanqidiy muhokama qilinib, mavjud muammolar hamda ularni bartaraf etish masalalari koʻrib chiqildi.
Shuningdek, Prezidentimiz tomonidan Toshkent shahrida xavfsiz muhitni shakllantirish boʻyicha oʻtkazilgan tanqidiy selektor yigʻilishida belgilangan vazifalar, xususan, uyushgan jinoyatchilik, narkojinoyatlar, kiberjinoyatchilik va yashirin iqtisodiyotga qarshi kurashish boʻyicha “poytaxt namunasi”ni viloyatlarda joriy etish masalalari muhokama qilindi.
Tadbir davomida qonun ustuvorligini taʼminlash, jinoyatlarni hisobdan yashirish holatlariga qatʼiy yoʻl qoʻymaslik, shuningdek, vazirlik Akademiyasi professor-oʻqituvchilari ishtirokida tashkil etilayotgan oʻquv-amaliy mashgʻulotlar orqali xodimlarning bilim va kasbiy salohiyatini oshirish yuzasidan bir qator aniq vazifalar belgilab berildi.
Xususan, tergovga qadar tekshiruvni amalga oshiruvchi xodimlarni (tezkor qidiruv, profilaktika, yoʻl harakati xavfsizligi xizmatlari, tergovchi va surishtiruvchilar) oʻqitish, ularning huquqiy bilimini oshirish maqsadida Tergov departamenti masʼullari, IIV Akademiyasi professor-oʻqituvchilaridan iborat ishchi guruh tomonidan rejalashtirilgan oʻquv-seminarlari boʻyicha vazifalar belgilab berildi.
Shuningdek, barcha hududlarda Huquqni muhofaza qilish akademiyasi tomonidan ushbu soha vakillarini onlayn ravishda oʻqitish boʻyicha tegishli chora-tadbirlar belgilandi.
IIV huzuridagi Tergov departamenti Axborot xizmati