O‘zbеkiston Rеspublikаsi Ichki ishlаr vаzirligi

Mamlakatimizda jamoat xavfsizligini taʼminlash va jinoyatchilikka qarshi kurashishning mutlaqo yangi tizimini joriy etish davlat siyosatining ustuvor yoʻnalishiga aylandi. Davlat rahbari Shavkat Mirziyoyev tomonidan Toshkent shahri misolida yoʻlga qoʻyilgan “poytaxt tajribasi” bugun respublikaning barcha hududlarida, jumladan, Jizzax viloyatida ham bosqichma-bosqich tatbiq etilmoqda. Shu maqsadda Ichki ishlar vaziri boshchiligidagi ishchi guruh tomonidan hududda amalga oshirilayotgan ishlar joyiga chiqqan holda oʻrganildi.

Dastlab Jizzax shahar ichki ishlar boshqarmasi huzuridagi qoʻriqlash boʻlimi faoliyati tahlil qilindi. Obyektlarni qoʻriqlovga olish, texnik qoʻriqlash pultiga ulash, signalizatsiya va tezkor xabar berish mexanizmlari, navbatchilik xizmati tashkil etilishi atroflicha koʻrib chiqildi. Ayni vaqtda Jizzax shahrida 1 742 ta obyekt qoʻriqlovga olingan boʻlib, 1 405 tasi texnik qoʻriqlash tizimiga ulangan. Shundan 1 175 tasi aholi xonadonlaridir. Bu koʻrsatkichlar xavfsizlik tizimi jinoyat sodir etilgandan keyin emas, balki uning oldini olishga qaratilganini koʻrsatadi. Xizmat sharoitlari va intizom masalalari yuzasidan ham aniq vazifalar belgilab berildi.

Jizzax shahar hokimligida mahallalarda “Chilonzor tajribasi”ni joriy etish boʻyicha shtab faoliyati oʻrganildi. Jinoyatchilikka qarshi kurashda umumiy statistika emas, balki har bir mahallaning oʻziga xos xususiyatlaridan kelib chiqib ish tashkil etish ustuvor vazifa sifatida belgilandi. Kriminogen vaziyatni barqarorlashtirishda ishsizlik, oilaviy nizolar, ijtimoiy muammolar kabi omillarni bartaraf etish hal qiluvchi ahamiyatga ega ekani taʼkidlandi. Shu bois tahlil, profilaktika va manzilli choralar uygʻunligi asosida ishlash zarurligi qayd etildi.

Yaqinlashib kelayotgan Ramazon oyi munosabati bilan ommaviy ibodat joylarida jamoat tartibini taʼminlash masalasi ham alohida koʻrib chiqildi. Jizzax shahridagi Xoʻja Nuriddin hoji jome masjidi misolida xavfsizlik rejalari muhokama qilinib, kuch va vositalarni maqbul taqsimlash, transport harakatini tartibga solish, videokuzatuv tizimlarini kuchaytirish orqali fuqarolar uchun xavfsiz va qulay muhit yaratish choralari belgilab olindi. Shuningdek, Jizzax shahar markaziy dehqon bozorida jamoat tartibini saqlash, narx-navo barqarorligini taʼminlash, sanitariya va obodlik holatini yaxshilash yuzasidan tegishli koʻrsatmalar berildi.

Gʻallaorol tumanidagi Madaniyat mahalla fuqarolar yigʻinida oʻtkazilgan uchrashuvda nizoli oilalar, ichkilikka ruju qoʻygan xonadonlar, xotin-qizlar oʻrtasida jinoyatchilikning oldini olish masalalari muhokama qilindi. Mahalla “yettiligi” faoliyatini kuchaytirish, profilaktik taʼsirchanlikni oshirish boʻyicha aniq vazifalar belgilab berildi.

Axborot texnologiyalari sohasidagi jinoyatlarga qarshi kurashish boshqarmasi faoliyati bilan tanishuv davomida internet orqali sodir etilayotgan jinoyatlarni barvaqt aniqlash, kiberfiribgarlik va elektron toʻlov tizimlariga tajovuzlarning oldini olish mexanizmlari muhokama qilindi. Bugun axborot makonida xavfsizlikni taʼminlash anʼanaviy jinoyatchilikka qarshi kurash bilan teng ahamiyat kasb etmoqda.

Shu bilan birga, Ichki ishlar vazirligi Jizzax akademik litseyida oʻquvchilarning taʼlim va yashash sharoiti oʻrganildi. Yotoqxona, sinf xonalari va axborot texnologiyalari bilan taʼminlanganlik darajasi koʻzdan kechirildi. Oʻquvchilar bilan muloqotda zamonaviy bilimlarni puxta egallash, kitobxonlikni kuchaytirish, axborot xurujlariga qarshi immunitetni shakllantirish va huquqiy madaniyatni oshirish zarurligi taʼkidlandi. Yoshlar tarbiyasi jamoat xavfsizligining strategik kafolati ekani alohida qayd etildi.

Jizzax viloyati hokimligida masʼul rahbarlar ishtirokida oʻtkazilgan kengaytirilgan yigʻilishda oʻtgan yil yakunlari tanqidiy tahlil qilinib, 2026-yil uchun ustuvor vazifalar belgilab olindi.

Taʼkidlanganidek, jinoyatchilikning oldini olish borasida muayyan ishlar qilingan boʻlsa-da, ayrim yoʻnalishlarda oqsoqliklar koʻzga tashlanmoqda. Xususan, Jizzax shahrida jinoyatchilik darajasining oshgani soha mutasaddilari tomonidan keskin tanqid qilindi.

Muhokamada joriy 2026-yilda Jizzax viloyatida xavfsizlikni taʼminlash boʻyicha ustuvor vazifalar ham belgilab olindi. Xususan, “poytaxt tajribasi” asosida har bir mahalla va koʻcha nazorati kuchaytirilib, “xavfsiz muhit” konsepsiyasi toʻliq joriy etiladi. Zamonaviy videokuzatuv vositalari oʻrnatilib, ular viloyat ichki ishlar boshqarmasining “Yagona tezkor boshqaruv markazi”ga ulanadi. Bu oʻz navbatida vaziyatni masofadan turib, real vaqt rejimida kuzatish imkonini beradi.

Bundan tashqari kiberjinoyatchilik, internet-firibgarlik va elektron toʻlov tizimlariga tajovuz qilishga qarshi zamonaviy tahlil mexanizmlari ishga tushiriladi. Tadbirkorlik obyektlari va aholi xonadonlarini ishonchli qoʻriqlovga olish boʻyicha targʻibotlarni kuchaytiriladi.

Yigʻilishda jinoyatchilikka qarshi kurashda faqat jazolash emas, balki uning ildizini bartaraf etishga alohida urgʻu berildi. Uyushmagan yoshlar bandligini taʼminlash, xotin-qizlar va bolalarga nisbatan zoʻravonlikning oldini olish, “qizil” toifadagi mahallalar bilan manzilli ishlash boʻyicha masʼullarga aniq topshiriqlar berildi.

Tadbir yakunida belgilangan vazifalarni tizimli va samarali amalga oshirishga qaratilgan chora-tadbirlar dasturini ishlab chiqish vazifasi yuklatildi.