Ichki ishlar vaziri oʻrinbosari Buxoroda: Tanqidiy tahlil, “Chilonzor tajribasi” va raqamlashtirish
2026-02-13 17:45:00 / Yangiliklar
Oʻzbekiston Respublikasi Prezidentining 2026-yil 5-yanvardagi PQ-1 va PQ-2-sonli qarorlari hamda sohani takomillashtirishga doir PQ–111 va PQ–253-sonli qarorlarida belgilangan vazifalar ijrosini taʼminlash, shuningdek, Buxoro viloyatida jamoat xavfsizligini taʼminlash borasidagi ishlarni koʻzdan kechirish maqsadida Oʻzbekiston Respublikasi Ichki ishlar vaziri oʻrinbosari, polkovnik Diyorbek Nematjonovich Sattorov Buxoro viloyatida oʻrganishlar olib bordi.
Tashrif davomida dastlabki manzil sifatida Buxoro viloyati IIB Tibbiyot boʻlimi gospitali faoliyati koʻzdan kechirildi. Kapital taʼmirlanib, zamonaviy qiyofa kasb etgan ushbu maskanda xodimlar, faxriylar va ularning oila aʼzolari uchun yaratilgan sharoitlar oʻrganildi. Bugungi kunda 96 nafar bemor davolanayotgan shifoxonaning moddiy-texnik bazasini yanada boyitish maqsadida, nafaqat xodimlar, balki aholiga ham sifatli pullik tibbiy xizmat koʻrsatishni yoʻlga qoʻyish boʻyicha takliflar bildirildi.
Shundan soʻng, vazir oʻrinbosari IIV Buxoro akademik litseyida boʻlib, oʻquv jarayonlari va yoshlar tarbiyasi bilan tanishdi. Xususan, 24 nafar yoshlar bilan profilaktik suhbatlar oʻtkazildi. Litsey oʻquvchilarining sogʻlom ovqatlanish ratsionini qayta koʻrib chiqish, taʼlim sifatini oshirishda IIV Akademiyasi professor-oʻqituvchilari bilan masofaviy darslarni tashkil etish boʻyicha aniq topshiriqlar berildi.
Tizim xodimlari farzandlarini ijtimoiy qoʻllab-quvvatlash maqsadida, “Yulduzcha” maktabgacha taʼlim tashkilotiga tashrif buyurildi. Hozirda 248 nafar tarbiyalanuvchi tahsil olayotgan ushbu muassasada bolalarni vatanparvarlik ruhida tarbiyalashda “Koreya tajribasi”dan foydalanish, “Bogʻcha-muzey” loyihasini tatbiq etish hamda bolalarda favqulodda vaziyatlarda toʻgʻri harakat qilish koʻnikmalarini shakllantirish boʻyicha koʻrsatmalar berildi.
Oʻrganishlar davomida viloyat Ichki ishlar boshqarmasida oʻtkazilgan yigʻilishda Prezidentimizning joriy yil 27-yanvar kuni oʻtkazilgan yigʻilishida belgilab berilgan ustuvor vazifalar ijrosi yuzasidan amalga oshirilayotgan ishlar atroflicha tahlil qilindi. Bu boradagi mavjud muammolar tanqidiy ruhda muhokama etilib, aniqlangan kamchiliklarni bartaraf etish hamda faoliyat samaradorligini oshirish yuzasidan aniq vazifalar belgilab berildi.
Navbatdagi manzilda, zamonaviy texnologiyalarni sohaga joriy etish ahvoli Tezkor boshqaruv markazi faoliyati misolida tahlil qilindi. Viloyat boʻyicha 14 mingdan ortiq kuzatuv kameralari integratsiya qilingan, 46 ta server va sunʼiy intellektga asoslangan “Qalqon” dasturi orqali boshqarilayotgan tizim imkoniyatlari yuqori baholandi. Jamoat joylaridagi xavfsizlikni toʻliq raqamlashtirish orqali jinoyatchilikni jilovlash samaradorligini oshirish vazifasi yuklatildi.
Tashrif yakunida Buxoro shahridagi “S.Ayniy” mahallasida boʻlib, “mahalla yettiligi” faoliyati oʻrganildi. 7 mingdan ortiq aholi istiqomat qiluvchi ushbu hududda jinoyatchilikni jilovlash va huquqbuzarliklarni erta aniqlash maqsadida Prezidentimiz topshirigʻiga asosan, poytaxtda sinovdan oʻtgan “Chilonzor tajribasi”ni keng joriy etish boʻyicha tavsiyalar berildi. Xususan, mahallaning “Yoʻl xaritasi”ni qayta koʻrib chiqish, ishsiz aholi bandligini taʼminlash va kriminogen vaziyatni barqarorlashtirish boʻyicha masʼullarga aniq muddatli topshiriqlar belgilab berildi.
Buxoro viloyati IIB Axborot xizmati