O‘zbеkiston Rеspublikаsi Ichki ishlаr vаzirligi

Andijon viloyati IIB boshligʻi tomonidan Andijon tumanida aholining ijtimoiy va huquqiy masalalardagi murojaatlarini hal etishga qaratilgan sayyor qabul oʻtkazildi.

Aholining ijtimoiy va huquqiy masalalarga doir murojaatlarini joyida koʻrib chiqish, fuqarolarni oʻylantirayotgan muammolarni bevosita oʻrganish hamda ularning yechimiga koʻmaklashish maqsadida joriy yilning 12-fevral kuni Andijon viloyati IIB boshligʻi, polkovnik Sanjar Djabarov tomonidan Andijon tumanining Noʻxatak mahallasi hududida sayyor qabul tashkil etildi.

Sayyor qabulda ichki ishlar organlari masʼul xodimlari bilan bir qatorda tegishli davlat idoralari va tashkilotlar vakillari ham ishtirok etdi. Bu esa fuqarolar tomonidan koʻtarilgan masalalarni har tomonlama va tezkor tarzda koʻrib chiqish imkonini berdi.

Qabul jarayonida fuqarolar ishga joylashish, tadbirkorlik faoliyatini yoʻlga qoʻyish, kredit mablagʻlari ajratish, Oʻzbekiston Respublikasi fuqaroligini tasdiqlovchi ID kartalar olish, probatsiya hisobidagi shaxslarga oid masalalar, shuningdek, boshqa ijtimoiy va huquqiy muammolar yuzasidan murojaatlar bilan ishtirok etdilar. Barcha murojaatlar belgilangan tartibda roʻyxatga olinib, koʻrib chiqildi.

Shu bilan birga, ichki ishlar organlariga biriktirilgan yoshlarning murojaatlarini hal etishga alohida eʼtibor qaratildi. Yoshlar tomonidan bildirilgan taklif va masalalar atroflicha oʻrganildi.

Sayyor qabul davomida ayrim murojaatlar joyida ijobiy hal etildi. Qoʻshimcha oʻrganish talab etuvchi masalalar esa nazoratga olinib, ular yuzasidan masʼullarga aniq vazifa va topshiriqlar berildi.

Andijon viloyati IIB rahbariyati tomonidan aholi murojaatlarini joylarda koʻrib chiqish, fuqarolar bilan ochiq muloqot oʻtkazish amaliyoti izchil davom ettirilmoqda. Bunday sayyor qabullarni kelgusida ham shahar va tumanlarda tashkil etish rejalashtirilgan.

Andijon viloyati IIB Axborot xizmati