Ichki ishlar vazirligi hamda Bosh prokuratura rahbariyati tomonidan Prezident qarorlari ijrosi yuzasidan Surxondaryo viloyatida amalga oshirilayotgan ishlar oʻrganilmoqda
2026-02-12 21:00:00 / Yangiliklar
Oʻzbekiston Respublikasi Ichki ishlar vazirligi hamda Bosh prokuratura rahbariyati tomonidan Prezidentimizning 2026-yil 5-yanvardagi “Respublika mahallalarida xavfsiz muhitni yaratish yoʻnalishida yaxlit manzilli ishlash tizimini joriy etishga qaratilgan qoʻshimcha chora-tadbirlar toʻgʻrisida”gi PQ-1-sonli hamda “2026-yilda Respublika mahallalarida jinoyatchilikning barvaqt profilaktikasi samaradorligini yanada oshirish boʻyicha tashkiliy chora-tadbirlar toʻgʻrisida”gi PQ-2-sonli qarorlari ijrosi yuzasidan Surxondaryo viloyatida amalga oshirilayotgan ishlar oʻrganilmoqda.
Jumladan, Angor tumanidagi “Sharq guli” mahallasida adliya organlariga yuklatilgan vazifalar ijrosi, nizoli oilalar bilan ishlash, ularning huquqiy muammolarini bartaraf etish borasida amalga oshirilayotgan ishlar tanqidiy muhokama qilindi. Nizoli oilalar salmogʻi yuqori boʻlgan mahallalarda qayta xatlov oʻtkazish, manzilli chora-tadbirlar belgilash hamda tizimli ishlarni kuchaytirish yuzasidan tegishli topshiriqlar berildi.
Shuningdek, aholi oʻrtasida huquqiy ong va huquqiy madaniyatni yuksaltirish, qonuniylikni mustahkamlashga qaratilgan huquqiy targʻibot tadbirlarini ommaviy axborot vositalari bilan hamkorlikda tashkil etish, mahalla raislarini nizolarni mediatsiya yoʻli bilan hal etish boʻyicha oʻqitish, sayyor qabullar orqali fuqarolarning murojaatlarini joyida hal etish choralarini kuchaytirish vazifalari belgilab berildi.
Termiz shahridagi “Turon” mahallasida esa xotin-qizlar tomonidan sodir etilishi mumkin boʻlgan huquqbuzarlik va jinoyatlarning barvaqt oldini olish boʻyicha amalga oshirilayotgan ishlar taqdimoti bilan tanishildi. Masʼullarga nizoli oilalarda yashovchi xotin-qizlarning turmush sharoitidan doimiy xabar olib borish, ular oʻrtasida oʻz joniga suiqasd qilish holatlarining oldini olishga qaratilgan psixologik tadbirlarni tizimli tashkil etish va nazorat qilish yuzasidan koʻrsatmalar berildi.
Bundan tashqari, probatsiya hisobida turgan 18 nafar xotin-qizlarning ijtimoiy muammolarini oʻrganish maqsadida mahallada sayyor qabul hamda boʻsh ish oʻrinlari yarmarkasi tashkil etildi. Ularning murojaatlari tinglanib, mavjud muammolarni joyida hal etish boʻyicha amaliy choralar koʻrildi.
Ishchi guruh tomonidan oʻrganish ishlari davom etmoqda.