Ayol va jamiyat. Eʼtibor taqdirni oʻzgartiradi
2026-02-11 12:00:00 / Yangiliklar
Hayotda baʼzan shunday onlar boʻladiki, birgina shirin soʻz, ozgina eʼtibor inson taqdirini oʻzgartirishi mumkin. Ayniqsa, hayot sinovlariga duch kelgan, turli sabablar bilan probatsiya nazoratida turgan xotin-qizlarni qoʻllab-quvvatlash, ularni ijtimoiy hayotga qayta moslashtirish muhim vazifalardan biri.
Buni yaxshi anglagan Urgut tumani IIB JXX Probatsiya boʻlinmasi xodimlari hisobda turgan 97 nafar xotin-qizlar dardini tinglash, muammolarini birgalikda hal etish maqsadida tuman Oila va xotin-qizlar boʻlimi, hamkor tashkilotlar vakillari ishtirokida uchrashuv tashkil etishdi. Har bir ayolning hayot yoʻli, muammo va orzu-umidlariga quloq tutildi. Mutaxassislar tomonidan ularning ruhiy holati oʻrganildi. Oʻzlariga boʻlgan ishonchni oshirishga qaratilgan psixologik suhbatlar oʻtkazildi. Shu bilan birga, ijtimoiy-huquqiy maslahatlar berilib, kasbga yoʻnaltirish, sogʻliqni saqlash, oilaviy masalalar kabi koʻplab maishiy-ijtimoiy muammolarni hal etish yuzasidan amaliy yordam koʻrsatildi. 6 nafar hisobda turuvchi ayol ish bilan taʼminlandi.
Nodira Kozimova (ism sharifi oʻzgartirildi) tumanning «Sariqtepa» mavzesida joylashgan Urgut Erkin iqtisodiy zonasidagi ishlab chiqarish korxonasidan oʻziga munosib ish topdi.
— Ayollar uchun ish boʻlsa ishlayman derdim. Tikuvchilik qoʻlimdan keladi, uyda tikuv mashinam bor. Bu ish men uchun qulay, ayniqsa transport va tushlik bilan taʼminlaganidan xursand boʻldim, — deydi u.
- Jamiyat taraqqiyoti, avvalo, inson taqdiriga boʻlgan munosabat bilan oʻlchanadi. Probatsiya roʻyxatiga olingan xotin-qizlarning salomatligi ham eʼtibordan chetda emas. Tuman Sogʻliqni saqlash boʻlimiga qarashli Markaziy poliklinika shifokorlari tomonidan bepul tibbiy koʻrik ham tashkil etildi. Bir qator mutaxassislar koʻrigidan oʻtgan xotin-qizlarga aniqlangan kasalliklari boʻyicha zarur muolaja koʻrsatilib, 12 nafariga statsionar davolanish uchun imtiyozli yoʻllanma berildi. Sogʻligʻi tufayli tibbiy koʻrikka kela olmagan 6 nafar xotin-qizlarning yashash xonadonlariga borilib, tibbiy koʻrikdan oʻtkazildi, — deydi tuman IIB JXX HPB xotin-qizlar masalalari boʻyicha katta inspektori, podpolkovnik Zulfiya Yuldasheva.
Darhaqiqat, hamjihatlik va insonparvarlik ustuvor boʻlgan jamiyatda har bir ayol qayerda, qanday sharoitda boʻlmasin oʻz oʻrnini topishi, munosib yashashi uchun imkoniyat bor. Muhimi, bu imkoniyatlarni his etish va ulardan unumli foydalanishdir.
Umida Mamadaliyeva, oʻz muxbirimiz. “Postda”
Samarqand viloyati